Gleðast fyri hosurnar
-Eg havi verið glaður fyri allar pakkarnar eg havi fingið frá sjómanskvinnuringunum, óansæð hvat var í. Samstundis má eg siga, at av tí at eg ofta eri kaldur um beinini, havi eg verið serliga glaður fyri góðar ullintar hosur, tí tær hita so væl- sigur Hjartvard Hansen, smílandi.
Hjartvard er stýrimaður og avloysaraskipari við frystilínuskipinum Stapanum. Hann skal vera skipari komandi túr, sum samstundis verður síðsti túrur hjá Stapanum í ár.
Hjartvard tók ímóti pakkunum tá sjómanstrúboðarin kom umborð við teimum fríggjadagin.
-Allir eg havi siglt saman við hava verið glaðir fyri jólapakkarnar. Samstundis eru allir spentir at vita hvat er í og ikki minst, at vita um gevarin hevur skrivað navn og adressu í. Er navn og adressa í, ja so verður práta um nakar kennir viðkomandi. Tá kunnu vit eisini takka gevarunum fyri pakkan. Tí er tað líkasum meiri persónligt um navnið stendur á kortinum- sigur Hjartvard.
Hann hevur siglt í 30 ár og hevur fingið jólapakka øll árini. Í pakkunum hava verið, millum annað, hosur, bøkur, bomm og annað gott. Tað er hann sera takksamur fyri og sigur, at sjómennirnir seta stóran prís uppá arbeiðið sum sjómanskvinnuringarnir og Sjómansmissiónin gera.
-Síðst á túrinum koma vit óivað at hava eina jólaløtu umborð við jóladøgurða, jólasálmum og jólaevangeliið. Tá fara vit at deila pakkarnar út og pakka upp. Tað gleða vit okkum til- sigur Hjartvard.
Stapin fer avstað seinnapartin í dag og 14 mans vera við.
Sjómansmissiónin ynskir teimum ein góðan túr og Guds signing.
Samstundis verður øllum okkara sjófólkið ynskt Guds signing og varðveitslu.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur