“Vit fara ikki at stuðla núverandi samgongu, men kunnu samráðast um eina nýggja, har allur politikkurin, men fyrst av øllum tað etiska, andaliga og sosiala, verður tikin til viðgerðar!” Tað skrivar Jenis av Rana, formaður í Miðflokkinum, á facebook.

Tosið um samskiftið millum leiðsluna í samgonguflokkunum og Miðflokkin snýr seg í stóran mun um at finna tey røttu orðini. - Er tað verandi samgonga, sum skal víðkast, ella er talan um eina nýggja samgongu við einum nýggjum samgonguskjali? Jenis av Rana er ikki í iva:

“Tað kemur ikki upp á tal at stuðla hesari samgonguni! Vit tosa um eina nýggja samgongu, har núverandi 17. atkvøðan als ikki verður við,” sigur hann.

Kringvarpið segði í gjár, at tey høvdu fingið fatur á samráðingarupplegginum, sum Miðflokkurin hevur sent samgonguni, og tað ber í øllum førum boð um, at tað veruliga er eina nýggja samgongu, ið Miðflokkurin vil hava.

Miðflokkurin sigur um fiskivinnunýskipanina, at bara nýtt tilfeingi skal seljast á uppboðssølu, og reglurnar fyri antitrust skulu vera munandi linari, enn samgongan vil.

Um pensjónsmálið sigur Miðflokkurin, at skattafría grundarupphæddin í fólkapensjónini skal fáa frið, og hon skal hækkast aftur til tað støðið, sum hon var á, áðrenn samgongan lækkaði hana.

Og fólkaatkvøða skal verða um hjúnabandslógina áðrenn 1. juli næsta ár.

Tað er lítið sannlíkt, at semja fæst í samgonguni um at eftirlíka hesum ynskjunum, og á hinari síðuni er spurningurin, hvussu nógv Miðflokkurin kann slaka í sínum krøvum, uttan at talan verður um at stuðla verandi samgongu, heldur enn at skipa eina nýggja samgongu.

Aksel V. Johannesen, løgmaður, hevur vent sær til Miðflokkin, tí full undirtøka er ikki í samgonguni fyri uppskotinum um sjófeingi. Men um Miðflokkurin heldur ikki tekur undir við uppskotinum, uttan at so stórar, grundleggjandi broytingar verða gjørdar í tí, so er spurningurin, hvat endamálið er við at víðka samgonguna, tí uttan iva ber eisini til at fáa breiðari undirtøku í samgonguni, um hesar broytingarnar verða gjørdar.  

7 vikur eru, til nýggjárs, tá lógin um sjófeingi skal verða sett í gildi.