Hann gjørdist 1,5 mia. kr. ríkari í gjár
Metúrslitið hjá norsku alifyritøkuni Salmar sendi í gjár partabrævakursin upp í loft og økti ognina hjá ríkasta mannininum í Norra upp aftur meira.
24 ára gamli aliarvingurin Gustav Magnar Witzøe er ríkasti maður í Norra við eini ogn upp á 11,1 miljard norskar krónur. Í gjár gjørdist hann 1,5 miljard ríkari, skrivar Dagens Næringsliv.
Metúrslitið hjá Salmar í triðja ársfjórðingi hevði við sær, at partabrøvini á middegi í gjár vóru hækkað 12 prosent á keypskálanum í Oslo, so virðið á fyritøkuni fór upp um 29 miljardir krónur.
Salmar-partabrævið fall síðani nakað aftur, men økingin gjøgnum dagin var kortini omanfyri 10 prosent.
Witzøe eigur 53,4 prosent av partabrøvunum umvegis felagið Kverva. Sostatt øktist ognin hjá laksaprinsinum við hálvari aðrari miljard krónum, skrivar blaðið.
Ognin 11,1 miljard í fjør
Úrslitið hjá Salmar fyri skatt var upp á 1,3 miljardir krónur í triðja ársfjórðingi ímóti 816 miljónum somu tíð í fjør.
Sambært stjóranum í fyritøkuni, Trond Williksen, er ein av orsøkunum til metúrslitið, at tey eru komin langt í handfaringini av avbjóðingunum við laksalús.
Gustav Magnar Witzøe fekk síðst í 2011 handað mestsum øll partabrøvini í Kverva av ótta fyri arvaskattalúsingi.
Laksaarvingurin hevði í fjør eina ogn upp á 11,1 miljard, skrivar Dagens Næringsliv.
Mest lisið í farnu viku
Samband
Heygsvegur 8
490 Strendur