Íslendsk innrás á Tvøroyri við útbúnaði til Varðan Pelagic
Næsta hálva árið ella so fer stórt tal av íslendingum at seta dám á gerandisdagin á Tvøroyri - serliga á havnarlagnum, har teir skulu seta ymsan útbúnað upp í nýggju verksmiðjuhøllini hjá Varðanum Pelagic.
-Tríggir teir fyrstu íslendingarnir eru longu komnir. Hinir koma so við og við, sigur Bogi Jacobsen, stjóri.
Talan er um montørar og maskinarbeiðarar frá teimum somu íslendsku fyritøkunum, sum settu upprunaliga útbúnaðin upp á Varðanum Pelagic - Skaginn á Akranesi og Frost á Akureyri.
Bogi Jacobsen veit ikki í løtuni at siga, hvussu nógvir íslendingar koma higar í hesum ørindum, men hann væntar, at talið onkuntíð fer at liggja um hálvthundrað ella har á leið.
Koma og fara
-Teir koma og fara allatíðina, so ilt er at siga, hvussu nógvir teir verða tilsamans, sigur stjórin á Varðanum Pelagic.
Útbúnaðurin, sum verður settur upp, er bæði úr Íslandi, Italia og Hollandi.
Uppsetingin av nýggju 150 metrar longu og 60 metrar breiðu verksmiðjuhøllini gongur væl, sigur Bogi Jacobsen.
Helvtin av stálskrokkinum er higartil settur upp, og í næstum verður farið undir at seta betongelementini upp, sum skulu skilja bygningin av.
Elementini koma higar við skipi úr Týsklandi.
Klárt í vár
Bogi Jacobsen torir framvegis ikki at áseta nakran dato fyri, nær virksemið hjá Varðanum Pelagic verður tikið upp aftur.
-Tað veldst nógv um veður og vind, sigur hann, men gongst alt eftir ætlan, verður tað einaferð í vár, leggur hann aftrat.
Íslendingarnir vera staddir á Tvøroyri til virkið verður tikið í nýtslu. Onkur teirra verður eisini har eftir uppstartin til tess at tryggja, at útbúnaðurin virkar, sum hann skal.
Mest lisið í farnu viku
Samband
Heygsvegur 8
490 Strendur