Kvinnudagur á Tvøroyri
Kvinnur talaðu til kvinnur.
Tað var Winnie Simonsen, sum er búsitandi á Tvøroyri, ið skipaði fyri kvinnudegnum. Dagurin byrjaði kl.10:00 og endaði kl.15:00 við einum væl reiddum køkuborði í kjallaranum í salinum.
Winnie sigur í samrøðu við Kristiligu Tíðindasendingina, at ynski við einum degi sum hesum er, at evnini verða løgd fram við einum serligum atliti til kvinnuna.
Hetta er ikki fyrstu ferð, at slíkur dagur verður fyriskipaður í Suðuroy, tí tað var vanligt í fleiri ár at samkomurnar í Suðuroy skipaðu fyri árligum kvinnudegi, men seinastu fýra árini hevur hetta ligið á láni, sigur Winnie, sum júst tí tók stig til átakið, sum vónar, at kvinnudagurin vil verða ein árligur afturvendandi veruleiki fyri kvinnurnar í Suðuroy.
Átakið var ikki einans ætlað kvinnum innan brøðrasamkomuna, men varð lýst soleiðis, at allar kvinnur skuldu kenna seg vælkomnar; og kvinnurnar í Suðuroy møttust yvir samkomugirðingarnar henda leygardagin í Salem á Tvøroyri.
Ein av kvinnunum varð boðin at hava tvær høvuðsframløgur, har hon lýsti sítt persónliga lív, samstundis sum hon vísti á tað alneyðuga í at hava fokusi á Jesusi. Aðrar kvinnur lúttóku við styttri innsløgum, har aktuel evnir vórðu lýst við einum persónligum íkasti.
Tá Winnie varð spurd, um tað er ein serligur tørvur á at savna kvinnur í samkomuhøpi á henda hátt, sigur hon heilt avgjørd: “Ja, tað er tað, man hoyrir ikki so nógv til kvinnurnar, og tær hava lyndið til at halda seg aftur.”
Winnie sigur, at siktað verður ímóti at hava ein kvinnudag aftur næsta ár, men ikki á Tvøroyri, men aðrastaðni á oynni.
Tripple Trioin í Ebenezer var boðin suður at syngja fyri kvinnunum, og tað gjørdu tær til stóra frøi fyri allar 80 kvinnurnar, sum vóru í Salem á Tvøroyri næstseinasta leygardag.
Líknandi tíðindi
Mest lisið í farnu viku
Samband
Heygsvegur 8
490 Strendur