Menn­inir vórðu handtiknir í apríl við ólógliga evninum í viðføri sínum.

Annar maðurin koyrdi úr hollendska býnum Zoetemeer til Hirts­hals, haðani hann síðani fór við Norrønu til Seyðis­fjarðar. Har hitti hann hin mannin, sum var komin við flogfari úr Stockhólmi. 

Menn­inir eita sambært Morgunblaðnum Lukasz Modzelewski og Pawel Piek­arski.

Íslendska tollvaldið hevði fingið frænir av, at ein pakki við ólógligum rúseitri var í onkrum av bilunum, sum komu við Norrønu henda dagin.

Strongdur og ørkymlaður

Tá teir bóðu um at kanna bilin hjá Pawel Piek­arski, virkaði hann ikki sørt strongdur og ørkymlaður.

Samstundis fekk hann fleiri sms-boð.

Tollararnir bóðu um at síggja telefonina og fingu ein pólskttalandi løgreglumann at hjálpa sær við at umseta boðini.

Har varð maðurin ávaraður um at ansa eftir tollarunum og narkohundinum.

Tollararnir lótu sum onki, men tá bilurin var komin í land í Seyðisfirði, koyrdu teir aftaná teimum báðum monnunum.

Tá teir komu til hotellið, har teir skuldu gista, vórðu póllendingarnir handtiknir, eftir at tollararnir funnu stóru ecstasy-nøgdina í viðføri teirra.

Menninir skulu umframt fýra ár í fongsul eisini rinda sakarmálskostnaðin umframt at hald varð lagt á bil teirra.