55 kvinnur av 100.000 millum 15 og 49 ár, sum ongantíð hava brúkt hormonala fyribyrging, fáa vanliga eftir einum ári bróstkrabba. Meðan 68 av 100.000, sum brúka hormonala fyribyrging, menna bróstkrabba.

Sostatt elva p-bollar, hormonspiralar, minibollar, p-plástur og p-ringar til 13 eyka tilburðir av bróstkrabba fyri hvørjar 100.000 kvinnur um árið.

- Hetta er fyrstu ferð í heimshøpi, at vit hava eina slíka kanning, har vit kunnu áseta vandan fyri bróstkrabba í mun til, hvussu leingi kvinnan hevur brúkt preparatið, sigur Øjvind Lidegaard, sum hevur verið við til at gjørt kanningina, við Politiken.

Hann er professari á Ríkissjúkrahúsinum og ein av heimsins fremstu granskarum í p-bollatrygd.

Vandin veksur við árunum

Kanningin vísir, at vandin fyri at menna bróstkrabba økist, tess longri kvinnan hevur brúkt hormonevnið. Eftir fyrsta árið er vandin øktur við níggju prosentum, meðan tað eftir tíggju ára nýtslu er ein 38 prosent øktur vandi fyri bróstkrabba.

Sambært professaranum koma 15 prosent av øllum tilburðunum av bróstkrabba innan kvinnan er fylt 50 ár. Tilsamans fáa 5000 danskar kvinnur á hvørjum ári diagnosuna.

Sambært kanningini er ongin munur á slagnum av hormonalari fyribyrging, sum kvinnurnar brúktu, og vandanum fyri at fáa bróstkrabba.

Anders Beich, formaður í vísindaliga felagnum hjá praktiserendi læknum, Dansk Selskab for Almen Medicin, er 'eitt sindur bilsin' um, at kanningin eisini knýtir hormonspiral at økta vandanum fyri bróstkrabba, sigur hann við Politiken.

Doris Stenver, yvirlækni í Heilivágsstýrinum og limur í hjáárinanevndini hjá ES, vísir á, at fyribyrgingarheilivágur er "týdningarmikil fyri nógvar kvinnur, vit kunnu ikki vera hann fyri uttan".

Kortini verður nýggja kanningin tikin upp á komandi fundinum millum heilivágsmyndugleikar í ES, sigur hon.