Stjórnin hjá Beate Szydlo forsætisráðarra í Warshawa er farin í hernað móti hættisliga lága burðartalinum í Pólandi og mælir pólendingum til at fáa fleiri børn, júst sum kaninur fáa nógvar ungar, eina nýggja løgu í hvørjari niðu.

Póland er katólskt, og fyrr fingu katolikkar fleiri børn enn fólk í protestantiskum londum. Men so er ikki longur. Nú man tað vera hvørt sum annað.

Í dag fáa katólsku londini, serliga í Suðurevropa, Portugal, Spania og Italia undir 1,5 barn pr kvinnu í miðal. Tað er langt undir viðlíkahald av fólkatalinum.

Úrslitið av verandi gongd kann við matematiskari (ella demografiskari) vissu gerast, at talið á øllum evropearum fækkar, og fólkið eldist.

Spies Ferðir gjørdi ein lýsingarfilm herfyri um, hvussu eldri konur kunnu blíva ommur: Teirra børn og verbørn kunnu fara í sólferiu suðureftir til at stimbra sær gessin, so børn spyrjast burturúr 9 mánaðir seinni, Danmark til frama.

Til at mótvirka tí lága burðartalinum gjørdi pólska heilsumálaráðið herfyri ein lítlan reklamufilm um fólkanøring. Stjórnin royndi at vísa á, hvussu kaninur fáa fleiri børn enn fólk, tí kaninur eta grønt og røra seg meiri enn pólendingar.

Upp ímóti kaninunum setti filmurin eini pólsk hjún, ið ikki sóu út til at hugsa so nógv um kærleika, samlív, kynsligt virksemi og nøring.

Ein tølandi rødd lesur upp í kaninfilminum: “Um tit ynskja at gerast foreldur, so fylg fyridøminum hjá kaninum: Soltnari mat, meiri rørslu og minni strongd.”

Spurdur av Associated Press um endamálið við kaninfilminum, svaraði ein talskvinna hjá heilsumálaráðnum, at pólska stjórnin ætlar bert at yvirtala pólendingar millum 18 og 45 ár um at liva sunnari og fáa fleiri børn.

Póland hevur næst lægst barnatal í Evropa, bert 1,32 barn pr kvinnu. Bert Portugal liggur lægri. Grikkaland og Italia beint yvir Pólandi. Um pólendingar o.a. evropearar ikki læra av kaninunum, verður Evropa tómt fyri evropearar.