Skotska Isle of Skye yvirrend av ferðafólki
Men nú er ovboðið hjá teimum 10.000 fólkunum, sum búgva fast á Skye. Ferðafólkini eru vorðið ov nógv í tali. Tað er sum í Mykinesi.
Tey, ið hava upplivað ta vøkru skotsku vesturstrondina, hava kanska verið yviri á Isle of Skye eftir nýggju brúnni um smala sundið, Kyle of Lochalsh.
Nógvir bretar vitja skotska hálandið og oyggjarnar á sumri, og 100-túsundtals fólk í Bretlandi, USA, Kanada, Australia og Nýsælandi hava skotskt “High- og Island”blóð rennandi í æðrunum og vitja gelisk støð, haðan forfedrarnir komu.
Skye er hin størsta av Innaru Hebridum (Suðuroyggjar á fornføroyskum) og sostatt vard av Ytru Hebridum móti havalduni av vesturættum.
Skye er eystasta økið í Skotlandi, har keltiska málið, Gaelic, verður tosað. Alt Skotland eystan fyri Kyle of Lochalsh tosar nú skotskt enskt. Fyri 200 árum síðan tosaðu fleiri 100-túsund skotar gelsiskt, men nú eru bert 40.000 eftir.
Skye er 1.660 km2, t.e. 200 km2 (sum Suðuroy+Sandoy) størri enn Føroyar til ummáls. Tá fólkatalið var sum mest, um 1860, búðu 40.000 fólk á Skye (sama sum í Hetlandi). Tá búðu bert 8.000 fólk í Føroyum.
Skye (eins og Hetland, Orknoyar og Hebridur) hevur goldið dýran prís fyri at hava bretskar “valdsharrar”. Stutt er inn á meginlandið, so lætt er at flyta.
Nú er fólkarákið øvugt. Nógvir skotar flyta út á Skye, tí har er so friðarligt.
Men tað kann eisini vera ovboðið. Oyggin hevur veikt infrakervi, og veganetið er lítið sammett við ta føroyska. Tí skal ikki so nógvir bilar, camping- og húsvognar til at ovbyrða oynna.
Hesi seinastu árini hevur Isle of Skye verið leikpallur og baksýni í fleiri popp-sjónbondum hjá Harry Styles og Kanye West og í filminum The BFG, sum alt hevur gjørt Skye eitt yndað ferðamál hjá 1.000-tals bretum og útlendingum.
Gistingarhús eru so yvirfylt, at fólk javnan sova í bilinum. Hitt seinasta er, at flotar av ferðaskipum goysa upp í 2.000 ferðafólk á land í senn, so har er ikki framkomandi. Almenn vesi eru so fá og spjadd, at fólk mest hjálpa sær úti.
Mest lisið í farnu viku
Samband
Heygsvegur 8
490 Strendur