Smyril Line fær herðaklapp frá íslendskum feskfiskaútflytarum
Tað hevur ongantíð verið lættari hjá íslendskum feskfiskaútflytarum at fáa vørur sínar út í heim enn nú. Hetta hevur m.a. Smyril Line verið við til at bøtt um við beinleiðis rutu síni millum Þorlákshöfn og Rotterdam, sigur sølustjórin hjá HB Granda við Morgunblaðið.
- Tá talan er um feskan fisk, er alneyðugt við góðum samstarvi millum veiðu-, sølu- og flutningsfeløgini til tess at tryggja, at vøran kemur rættstundis fram og varðveitir góðskuna allan vegin á pannuna, sigur Sindri Már Atlason, sølustjóri.
-Nýggja rutan millum Þorlákshöfn og Rotterdam, við fráferð hvønn fríggjadag, hevur avgjørt verið við til at bøtt munandi um hesar møguleikarnar, sigur hann.
-Áður fóru skipini úr Reykjavík hóskvøld. Tað, sum so kom upp á land fríggjadag, fór avstað við flogførum. Nú kann meginparturin av hesum fiskinum fara beinleiðis við Smyril Line fríggjadag. Teir brúka flutningsvognar ístaðin fyri bingjur, og tað styttir munandi um lossingina og lastingina av skipinum, leggur hann aftrat.
Fiskurin, ið verður avskipaður úr Þorlákshöfn fríggjakvøld, kemur til Hollands seint mánadag og er longu spjaddur um alt Evropa týsmorgun.
Feskur fiskur við flogfari til USA og Kanada
Nógv økta flúgvingin upp á Ísland seinastu árini er somuleiðis komin væl við hjá íslendsku feskfiskaútflytarunum.
Fyrr var avmarkað pláss fyri farmi í flogførunum, so neyðugt var at leiga serlig farmaflogfør til hendan flutningin.
Í dag verður flogið nógv títtari og til fleiri ferðamál enn fyrr, umframt at flogførini eru størri og sostatt eisini kunnu taka meiri farm, vísir sølustjórin hjá HB Granda á.
Økta flúgvingin upp á Ísland hevur havt við sær nýggjar og góðar marknaðir fyri feskum, íslendskum fiski í Kanada og á vesturstrond USA, skrivar Morgunblaðið.
Mest lisið í farnu viku
Samband
Heygsvegur 8
490 Strendur