Ætlaði at hjálpa - varð ístaðin stungin
20-ára gamli albanin, Klevis Sula, sum doyði fríggjadagin, eftir at vera knívstungin á Eysturvølli í Reykjavík næstsíðstu sunnunátt, ætlaði at ugga banamann sín, sum hann tók synd í, tí hann stóð og græt.
Ístaðin varð Klevis so meint stungin, at lív hansara ikki stóð til at bjarga.
Tað sigur móðir hansara, sum er komin til Íslands eftir líkinum, við útvarpsrásina Stöð 2 sambært Morgunblaðnum.
Klevis hevði verið í Íslandi í nakrar dagar, tá hann varð álopin saman við einum øðrum landsmanni.
Hann hevði áður verið í Íslandi í longri tíð.
Landsmaður hansara varð eisini stungin, men varð útskrivaður av sjúkrahúsinum í síðstu viku.
Ein íslendingur í tríatiárunum situr varðhaldsfongslaður undir illgruna fyri at hava framt illgerðina.
„Klevis var vinarligur og góður. Hann kom til Íslands at arbeiða og fáa eitt betri lív,“ segði Enea Sula, bróðir Klevis, við Stöð 2.
Ein innsavning er sett í verk í Íslandi til frama fyri familjuna hjá dripna albananum.
Mest lisið í farnu viku
Samband
Heygsvegur 8
490 Strendur