Milica van Doorn var 19 ára gom­ul, tá hon varð myrd. Hon búði í býnum Za­andam nærindis Amster­dam. Lík henn­ara varð funnið 8. juni í 1992 í eini tjørn í býnum. Hon hevði verið í føðingardegi um kvøldið, og stutt eftir midnátt tók hon bussin til hús, men kom tó ongantíð fram.   

Sam­bært lóg, sum kom í gildi í 2012, hevur løgreglan heimild at taka sýni av fólki í vón um at avdúka gomul brotsverk. Sýni vórðu tikin av 130 sjálvbodnum monnum, sum búðu í Zaandam, tá morðið varð framt, at brúka í kanningararbeiðnum.

Felags fyri hesar menninar var, at teir allir høvdu ættarbond til Turkalands.

Av turkiskum uppruna

DNA-sýni, sum vórðu funnin á kvinnuni, vístu, at forfedrarnir hjá drápsmanninum vóru haðani. Eisini varð ein maður av turkiskum uppruna sæddur á súkklu nærindis staðnum, har líkið varð funnið.

DNA av einum av hesum 130 monnunum vísti seg at samsvara við DNA-sýni, sum vórðu funnin á kvinnuni. Í kjalarvørrinum á hesi avdúking varð ein skyldmaður tikin inn til kanningar, sum vístu 100% sam­svar við DNA-sýnið.  

„Hetta er fyrstu ferð, at ein persónur er handtikin, eftir at tilknýti til eitt drápsmál er funnið gjøgnum slektina,“ segði Bob Steensma, ákæri úr Norðurhollandi, á tíðindafundi sambært hollendskum og altjóða miðlum. 

Maðurin situr nú í varðhaldi, og avgjørt verður í næstu viku, um hann verður latin leysur ímóti veðhaldi. 

Familjan hjá myrdu kvinnuni varð kunnað um handtøkuna sunnudagin. Tey siga hetta vera ein miklan lætta og takka løgregluni og turkunum í umráðnum fyri alla hjálpina.