Forkvinnan í stjórnarskipanarnevndini er fegin um, at landsstýrið hevur "dagført samansetingina av nevndini", so hon kann taka arbeiðið upp aftur.

- Nevndarlimirnir hittast andlit til andlits í næstu viku í Nuuk við tí fyri eyga at taka arbeiðið upp aftur, sigur Vivian Motzfeldt í tíðindaskrivi sambært KNR.

Ikki verið saman síðani november

Stjórnarskipanarnevndin legði arbeiðið niður í november, tí ivi stóðst um, hvørt Mala Høy Kuko og Ane Hansen framvegis kundu vera limir í nevndini.

Síðani hevur bæði formaðurin í Inuit Ataqatigiit, Sara Olsvig, og landsstýriskvinnan í sjálvstýrismálum, Suka K. Frederiksen, í skørpum vendingum heitt á nevndina um at taka arbeiðið upp aftur.

Báðar hava sagt, at Motzfeldt ikki skuldi blanda seg í samansetingina av nevndini, men nú hevur landsstýriskvinnan so gjørt av at skifta ein lim út og koyra ein annan, sum er í farloyvi, úr nevndini. Ongin verður vald í hennara stað.