Upp í hetta tal verða bert roknaðar skundviðgerðir, og aðrar minni átrokandi viðgerðir eru longu skumpaðar langt út í árið, skrivar The Daily Telegraph.

Bretska avísin sigur, at øll landsins sjúkrahús hava fingið boð um at strika í óavmarkaða tíð allar tær viðgerðir, ið ikki hava bráðskund.

Bretskir læknar kalla støðuna meinlíka henni í 3. heimslondum. “Hetta er ringasta vetrarkreppa í 30 ár,” halda fleiri sjúkrahús- og læknastjórar.

Flestu sjúkrahús boða frá ruðuleika, so fleiri krímrakt eldri í lívsvanda bíða upp í 12 tímar eftir lækna ella sjúkrabili ella sita einsamøll í bíðirúmum.

Fleiri læknamiðstøðir eru eisini stongdar í óavmarkaða tíð.

Mong sjúkrahús leggja menn og kvinnur á somu stovur. Sjúkrabilatænastur eru niðurlagdar av peningatroti, so hýruvognar hava góðar dagar. Økisdeildir, ið umfata 9 mió brúkarar, hava boðað frá, at heldur eingi gongspláss eru eftir.

“Vit hava rokkið hægstu neyðtilbúgving,” boðaði ein leiðandi myndugleiki frá. Viðkomandi legði aftrat, at tey vænta støðuna at versna næstu vikurnar.

Portørar og 1. hjálparar í sjúkrabilum bíðaðu í røðum uttan fyri sjúkrahús í yvir 500 tímar íalt seinnu helvt í farnu viku, skrivar blaðið.

Á almennum ellisheimum bíða búfólk upp í 12 tímar, áðrenn starvsfólk røkka runt at taka sær av teimum. So har man vera vátt og skitið í mangari song.

BBC gjørdi vart við regluna, at sjúk fólk skulu bert bíða 15 min á skaðastovu.

“75.000 sjúklingar hava longu í ár bíðað yvir hálvan tíma (dupult so leingi sum álagt) og nøkur heilt upp í 5 tímar frá sjúkrabili til skaðastovuviðgerð.

“Hví so galið,” spyr Telegraph og svarar sjálvt: “Slíkur ruðuleiki er ein náttúrlig fylgja av, at staturin veitir “ókeypis” tænastur til øll fólk við ómettiligum tørvi.”

“Tey eldru fjølgast, ið krevja meiri og dýrari heilsurøkt fyri hvønn dag, og tá eingin merkir prísin á dýrari tænastum, kollapsar skipanin av pengatroti.”