Týsk Samherja-skip fingið nøvn
Tveir nýggir frystitrolarar hjá dótturfelagnum hjá íslendska útgerðarfelagnum Samherja, Deutsche Fischfang Union, fingu um dagarnar nøvn við eitt stórt hátíðarhald í Cuxhaven.
Kona týska landbúnaðar- og fiskimálaráðharran, Annegret Aeikens, gav øðrum skipinum navnið Berlin NC-105, meðan kona íslendska stjóran í DFFU, Harpa Águstsdóttir, gav hinum skipinum navnið Cuxhaven NC-100.
Hetta eru fyrstu nýbygningarnir hjá felagnum síðani 1990, skrivar heimasíðan hjá Samherja.
Meira enn 400 gestir úr 17 londum vóru við til hátíðarhaldið, har m.a. borgarstjórin í Cuxhaven, Dr. Ulrich Getsch, var millum røðararnar.
Stolt og glað
„Í dag eru vit fyrst og fremst stolt og glað. Vit geva tveimum glæsiligum skipum nøvn, og eingin skal ivast í, at vit trúgva á framtíðina. Vit hava starvast í hesum umhvørvinum síðani 1996, og eru hetta okkara fyrstu nýbygningar í Týsklandi,“ segði Þorsteini Má Baldvinssoni, forstjóri í Samherja, m.a. í røðu síni.
„Fyrstu ár okkara her vóru onki at reypa av. Men seinastu árini hevur gingið væl, og vit vænta, at hesi bæði skipini fara at vera við til at seta sín dám á útgerðarsøgu okkara í Týsklandi,” legði hann aftrat.
Frystiskipini eru 81,2 metrar long og bygd á norsku skipasmiðjuni Mykleburst í samvinnu við Rolls-Royce. Meginparturin av útgerðini umborð er frá íslendskum fyritøkum, so sum Slippinn og Kælismiðjuni Frost á Akureyri, Vélfag á Ólafsfirði, Héðinn hf., Brimrúnu og Marel.
Hetta eru í høvuðsheitum somu feløg, sum lata útgerðina til nýggja uppsjóvarvirkið hjá Varðanum á Tvøroyri.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur