Klipp fyri at brúka telefon í bilinum - kanska eisini í Føroyum
Í Danmark er semja millum politikarar um at herða revsingina fyri at tosa í handhildnari telefon ella senda sms-ir, meðan ein koyrir bil. Hetta eigur at geva eitt klipp í koyrikortið, halda teir. Hetta gevur ikki klipp í Føroyum sum er.
Ringir fartelefonin hjá donskum bilførarum, ella skulu teir endiliga svara einum smsi, meðan teir koyra bil, so fara teir í framtíðini at fáa eitt klipp í koyrikortið, verða teir tiknir.
Tað skrivar DR Nyheder.
Stjórnin og Danski Fólkaflokkurin eru vorðin samd um at herða bæði reglur og revsing fyri at brúka fartelefon ella aðra útgerð undir koyringini.
Klipp og bót
Í framtíðini fer hetta at kosta eitt klipp í koyrikortið og eina bót upp á 1.500 krónur.
Í dag er revsingin fyri at brúka handhilna fartelefon í bilinum bert ein bót upp á 1.500 krónur.
- Hetta er ein stór og effektiv revsiherðing. Tað er mín greiða fatan, at fólk hava størri virðing fyri hasum har klippinum í koyrikortið. Tí tey vita, at fáa tey trý klipp, so er altso vandi fyri at missa koyrikortið, sigur Ole Birk Olesen, flutningsmálaráðharri, við DR Nyheder.
Trý klipp kosta koyrikortið
Fær ein trý klipp í koyrikortið í trý ár, missir ein koyrikortið treytað og skal upp til nýggja teori- og koyriroynd.
Loyvt verður við nýggju reglunum framvegis at tosa í hondfríari fartelefon undir koyringini
Danski Fólkaflokkurin stuðlar uppskotinum hjá stjórnini. Sostatt er frammanundan meiriluti tryggjaður fyri lógaruppskotinum, sum flutningsmálaráðharrin fer at leggja fram í heyst.
Helst eisini í Føroyum
Føroyska ferðslulógin heimilar ikki klippi í koyrikortið fyri at tosa í handhildnari fartelefon.
Ikki sum er ið hvussu er.
Vakthavandi á Politistøðini í Havn væntar tó, at kemur hetta í gildi í Danmark, gongur neyvan long tíð, áðrenn tað eisini verður broytt í føroysku ferðslulógini, næstu ferð hon verður dagførd.
Revsingin fyri at tosa í handhildnari fartelefon í Føroyum er bót.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur