Í løtuni eru 10 búpláss til borgarar við demenssjúku har umframt dagtilhald.

Ætlanin er at umbyggja Tjarnarlon til 8 umlættingpláss, ætlað borgarum við demenssjúku, og at loftið verður útbygt við kvistum, soleiðis at har verða høli bæði fyri dagtilhaldinum og til venjingar hjá ergoterapeutum og fysioterapeutum, sum í dag ongar slíkar umstøður hava.

Endamálið við einum demensdepli er, at borgarar við demenssjúku, sum verða knýttir at deplinum, fáa tilboð, ið nøktar tørv teirra á einum stað, soleiðis at ein borgari kann fáa dagtilhald, kvøldtilhald, vikuskiftistilboð, umlætting, venjingar og búpláss á sama stað, sigur kommunan.

Bíligari enn sjálvstøðug eind

Hetta verður mett sum ein fyrimunur fyri borgarar við demens, tí umhvørvið og starvsfólkini eru kend, og tað skapar tryggleika fyri tann demesrakta.

Samanborið við at byggja nýggja sjálvstøðuga eind, gevur henda loysnin rakstrarligar fyrimunir.

Umframt at seta nøkur nýggj starvsfólk, er ætlanin at samansjóða verandi starvsfólkahóp á Tjarnargarði, so økingin av starvsfólki verður minni enn um sjálvstøðug eind varð bygd, sigur kommunan. 

Býráðið samtykti í fjørheyst at taka undir við verkætlanini og geva umsitingini heimild at gera ráðgevarasáttmála um prosjektering og útboð. Í síðstu viku samtykti býráðið at játta pening til endamálið.

Parturin av Tjarnargarði, har gamla Marinustøðin helt til, tørvar stórar ábøtur.

Bygningurin er upprunaliga frá 1960, men varð umbygdur og tikin í nýtslu sum røktarheim í 2004. Seinni kom eisini dagtilhald. 

Málið um at umbyggja heimið, so pláss verður fyri 8 umlættingarplássum, kemur fyri á býráðsfundi hóskvøldið. Tá skal eisini bygginevnd veljast.