Seinastu dagarnir hava fólk varnast stóru broytina, ið er gjørd á økinum við Smærugøtu í Trongisvági, skamt frá barnagarðinum og Ítróttarhøllini.

“Tað er fyritøkan E-grevstur, ið hevur staðið fyri arbeiðinum at gera nýtt parkeringsøki, í samband við at barnagarðurin verður útbygdur,” sigur Tvøroyrar kommuna á síni facebook-síðu.

“Nú tá útgrevsturin til sjálvan barnagarðin fer í gongd, verður núverandi parkeringsøkið hjá barnagarðinum alt eitt arbeiðsøki. Tí verður byrjað við at gera nøktandi parkeringsøki til tey, ið hava børn á stovnunum,” sigur kommunan.

Ein gøta verður gjørd framvið vegnum og samstundis verður hegn sett upp út móti smærugøtu, so fólk trygt kunnu avlevera børnini á stovn.

“Parkeringsøkið er annars alment og ikki einans ætlað barnagarðinum,” sigur kommunan. Vaksandi virksemið í Trongisvági, har skúli, barnagarður og fótbóltsvøllur øll liggja, førir við sær øktan tørv á parkeringsplássum og kommunan vónar, at hetta fer at hjálpa.

Í næstum verða parkeringsbásar eisini uppteknaðir longur úti á Smærugøtu, á økinum niðan móti Ítróttarhøllini.