Árini frá 1982 til 2000 tá lítil aling var, fiskaðu føroyskir hummarabátar tilsamans í meðal sløk 72.000 kg av hummara um árið. Men síðani ár 2000 er hetta talið komið niður á sløk 47.000 kilo. Hetta er ein afturgongd á 34,7%, og Hummarafelagið gevur alingini skuldina fyri hetta.

“Talið av loyvum og rúsum hevur ligið javnt øll árini, og meskastødd og minstamál eru óbroytt,” sigur Hummarafelagið.

Vit hava spurt Niels Winther, ráðgeva hjá Havbúnaðarfelagnum, men hann vil onga viðmerking gera í dag.

“Eg havi verið upptikin í allan dag og havi framvegis ikki lisið hoyringsskrivið frá Hummarafelagnum,” sigur Niels Winther. Hann lovar tó at koma við eini viðmerking í morgin. Tað einasta hann vil siga í dag er, at ongar stovnsmetingar eru gjørdar av hummarum, og eingin veit heldur, um til dømis ovfisking kann vera ein orsøk til, at fiskiskapurin er minkaður.

Hummarafelagið vísir á nógvar avbjóðingar, sum limir felagsins hava at stríðast við orsaka av alingini. Felagið vísir millum annað á, at alibrúkini dálka illa, serliga í sambandi við avlúsing, og eisini eru akker og línur hjá alibrúkunum til stóran ampa fyri hummaraveiðuna.

Hummarafelagið sendi hoyringsskriv inn til Uttanríkis- og Vinnumálaráðið í juni í fjør í sambandi við nýggju alilógina, men av eini ella aðrari orsøk varð hoyringsskrivið ikki lagt við uppskotinum, tá tað varð lagt fyri Løgtingið í desember. Felgagið sendi tí Vinnunevndini hoyringsskrivið í farnu viku.