Umframt rakstrarúrslitini snýr spenningurin seg eisini um, hvussu stórt vinningsbýti partaeigararnir fáa, skrivar e24.no.

Í feløgum sum Lerøy og Salmar verður roknað við miljardavinningsbýtum.

Um metingarnar hjá greinarunum halda, endaði 2017 verri enn 2016 - eitt ár, sum royndist sera væl, eftir eina laksapríshækking, sum ikki endaði, fyrrenn prísirnir lógu um 80 norskar krónur fyri kilo.

Stórt prísfall

Gjøgnum alt árið í fjør fall laksaprísurin, m.a. tí at meiri laksur kom á marknaðin.

Í eini støðu, har farið er frá tódnandi laksatilboðum, ikki minst orsakað av sjúkutrupulleikum, til tilboðsvøkstur, hevur prísurin verið nógv ávirkaður.

Nordea spáddi í desember ein alheims tilboðsvøkstur av laksi upp á átta prosent í 2018, eftir vøksturin upp á fýra prosent árið fyri, meðan tilboðið var tódnað í 2016, sambært eini frágreiðing.

Í fjórða ársfjórðingi lá laksaprísurin á spottmarknaðinum ofta um 50 norskar krónur fyri kilo, men við einum botni upp á 45 krónur kiIo, umleið 40 prosent lægri enn hægsti prísurin í byrjanini av 2017, vísa tøl frá Fishpool sambært e24.no.

Fyri inntøkuna hjá laksafeløgunum fer tó parturin av fiski, sum er seldur sambært fastpríssáttmálum, at hava ávirkan á gongdina.

Meiri fiskur, lægri úrslit

Eins og vant hevur heimsins størsti laksaalari, Marine Harvest, longu avdúkað sítt úrslit í tríggjarmánaðarskeiðnum.

Sokallaða operasjonella rakstrarúrslitið lækkaði til 177 miljónir evrur í ársfjórðinginum úr methøgu 259 miljónum í fjórða ársfjórðingi 2016, meðan framleiðslan hækkaði til 113.000 tons úr sløkum 100.000 tonsum.

Longur niðri í roknskapinum síggja greinararnir fyri sær, at úrslitið eftir skatt lækkar til 135 miljónir evrur úr 211 miljónum evurum í tíðarskeiðnum, sambært metingum frá SME Direkt/TDN.

Vænta miljardavinningsbýti

Eisini hjá tveimum av trimum øðrum tungvektarum fer fjórði ársfjórðingur í fjør at vísa afturgongd, sambært metingunum:

Operasjonella rakstrarúrslitið hjá Lerøy fer væntandi at lækka til 867 miljónir norskar krónur úr 1.017 miljónum krónum í fjórða ársfjórðingi 2016. Her væntast eitt vinningsbýti fyri 2017 upp á 1,90 krónur fyri partabrævið, sum svarar til 1,13 miljardir krónur.

Um metingarnar halda, fer Bakkafrost at hava eitt operasjonelt rakstrarúrslit upp á 234 miljónir krónur ímóti 350 miljónum í sama ársfjórðingi árið fyri. Roknað verður tó við einum øktum vinningsbýti úr 8,70 krónur fyri partabrævið árið fyri til 9,66 krónur fyri partabrævið fyri 2017, svarandi til 472 miljónir krónur.

Mótsætt hinum trimum feløgunum omanfyri, vænta greinararnir, at Salmar fer at hava eitt operasjonelt rakstrarúrslit upp á 765 miljónir krónur ímóti 557 miljónum árið fyri. Til partaeigararnar væntast eitt vinningsbýti upp á 13,96 krónur fyri árið ímóti 12 krónum árið fyri, svarandi til 1,58 miljardir krónur.