Á hvørjum vetri liggja mong fólk eftir longdini við influensa ella beinkrími, og ársins umfar er júst í hæddini.

Beinkrím varir vanliga eina góða viku, men mong kunnu kenna seg lin og móð longri enn tað.

Nú hevur Shionogi & Co ment ein heilivág, sum fær bilbugt við virusinum eftir minni enn 24 tímum, skulu vit trúgva japonsku fyritøkuni.

Heilivágurin kemur væntandi á marknaðin í Japan longu í mars, skrivar Bloomberg. Sambært blaðnum fer fyritøkan at søkja góðkenning í USA og Evropa í summar, og heilivágurin kemur sostatt á hillarnar í fyrsta lagi næsta vetur.

– Hetta er ein heilivágur, ið skal hava felags góðkenning í øllum Evropa. Verður hann góðkendur í Evropa, kemur hann eisini til Norra, sigur Steinar Madsen, medisinskur fakstjóri í norska heilivágsverkinum, við NRK.

Fyribils góðkendur í Japan

Heilivágurin, sum fyrr var mest kendur sum S-033188, varð fyribils góðkendur í Japan í síðstu viku, sambært Bloomberg.

Nýggja tablettin verður spádd at hava nógv skjótari ávirkan enn verandi heilivágur ímóti beinkrími. Mótsatt tildømis Tamiflu, sum verður tikið tvær ferðir um dagin í fimm dagar, er nógmikið at taka henda heilivágin eina ferð.

-Hetta er ein spennandi heilivágur, men vit vita alt ov lítið um hann fyri at kunna siga nakað ítøkiligt um ávirkan og hjáárin, sigur Steinar Madsen við NRK.

– Er tað møguligt at sleppa av við beinkrím eftir einum degi, so sum japanska fyritøkan heldur upp á?

– Vit mugu fyrst hyggja at vísindaligu skjalprógvanini og kanningunum, ið eru gjørdar. Hetta er ein spildurnýggj virknaðarmekanisma, so tað er møguligt, at hetta kann vera ein effektivari heilivágur enn tann, vit hava í dag.

Kærkomin

Karoline Bragstad, virkandi deildarstjóri á beinkrímadeildini á norska Fólkaheilsustovninum, hevur góðar vónir um heilivágin.

– Flestu lond hava bert ein ella tveir atkomiligar heilivágir ímóti beinkrími. Við viðgerð í fleiri dagar, er vandi fyri menning av resistensi. Nýggir heilivágir við øðrum virknaðarhættum enn teimum vit hava í dag, eru tí kærkomnir, sigur hon.

Heilivágurin sigst hjálpa ímóti bæði influensa A og influensa B, og hevur víst seg at hava betri ávirkan enn Tamiflu, upplýsir Karoline Bragstad.

Nýggi heilivágurin inniheldur eitt virknaðarevni, sum forðar evnunum hjá virusinum at yvirtaka kyknur okkara. Tískil verða ikki nýggj virus framleidd, sum kunnu smitta nýggjar kyknur, tá viðgerðin er veitt.

– Nógv færri virus vera í umferð undir viðgerðini, tú verður skjótari frískur aftur, fær færri avleiðingar av ígerð, og vandn fyri at smitta onnur minkar, sigur Karoline Bragstad við NRK.

Møguligt gjøgnumbrot

Martin Howell Friede, sum er leiðari fyri koppingargranskingini hjá Alheims heilsustovninum, er positivur mótvegis nýggja heiliváginum.

– Tað, vit hava sæð higartil, sær sera lovandi út. Hetta kann vera eitt gjøgnumbrot í háttinum at viðgera beinkrím, sigur Friede við The Wall Street Journal.