15-ára gamal deyður av ecstasy
Ein 15-ára gamal drongur í Haslev í Danmark er deyður, eftir at hava tikið sera sterku útgávuna av evninum MDMA, eisini kent sum ecstasy.
Drongurin doyði á Ríkissjúkrahúsinum í nátt, skrivar TV Øst sambært Ritzau.
Tann 15-ára gamli tók 2. februar saman við einum floksfelaga vandamikla evnið. Um kvøldið vórðu báðir innlagdir á sjúkrahúsið í Køge, eftir at teir vóru vorðnir illa sjúkir.
Skjótt varð greitt, at støðan var sera álvarsom, og tí varð tann nú deyði drongurin fluttur á Ríkissjúkrahúsið, men lív hansara stóð ikki til at bjarga.
Løgreglan ávarar í hesum sambandi enn einaferð tey ungu ímóti at taka slík evni.
Ein handtikin
Fyribils er ein 17-ára gamal drongur varðhaldsfongslaður í málinum. Hann er skuldsettur fyri at hava selt vandamikla evnið og elvt til, at lívið hjá øðrum kom í vanda.
Løgreglan er sannførd um, at tann 17-ára gamli bert hevur ein lítlan leiklut í málinum. Málið er at fella veruligu bakmenninar.
Samstundis upplýsir løgreglan, at deyðiliga evnið hevur breitt seg. Fyribils hava fleiri persónar í Haslev og Næstved greitt frá ringum hjáárinum, eftir at hava tikið ecstasytablettir.
Mest lisið í farnu viku
Samband
Heygsvegur 8
490 Strendur