Høgni Hoydal, fiskimálaráðharri, hevur eftir ráðførslu við Uttanlandsnevnd Løgtingsins tikið avgerð um at áseta føroysku kvotuna av norðhavssild til 88.350 tons fyri 2018.

Hóast strandarlondini framvegis ikki eru samd um at býta norðhavssildina sínámillum, samdust tey tó í Keypmannahavn 7. desember 2017 um mest loyvdu veiðu á 435.000 tons fyri 2018, umframt onnur viðurskifti, eitt nú at endurskoða langtíðar umsitingarætlanina. Viðmerkjast kann, at seinasta ár vóru fiskaði 800.000 tons og í 2018 verða samlaðu ássettu kvoturnar væntandi 560.000 tons. Londini semjast um eitt TAC, men síðan áseta tey sín egna prosentpart og tilsamans fiska londini væl meira enn tað TAC tey annars siga seg verða samd um.

Føroyski luturin av norðhavssild er hækkaður eitt vet í mun til í fjør til tess at lutfalsliga útjavna nýliga økt krøv frá øðrum pørtum.

Herfyri avgjørdi Høgni Hoydal eftir ráðførslu við Uttanlandsnevnd Løgtingsins at áseta føroysku kvotuna av svartkjafti til 493.081 tons fyri 2018, eftir at strandarlondini samdust í Keypmannahavn 7. desember 2017 um mest loyvdu veiðu á 1.387.872 tons fyri 2018. Her er tað sama galdandi sum við sildini. Londini avtala TAC og áseta síni egnu prosent og samlaða veiðan í 2017 var uml. 300.000 tons meira enn TAC hjá ICES og í 2018 verður tað á leið sama støða.

Fiskiskapurin eftir svartkjafti og norðhavssild í 2018 verður skipaður í kunngerðum og verður kunngerðin um norðhavssild lýst í næstu framtíð.