Í eini kanning, sum lærdi háskúlin í Bergen hevur gjørt, svara 36 prosent av teimum spurdu, at tey vænta, at fiskur verður týdningarmesta vinnan í Norra í framtíðini, skrivar NRK. Bert 22 prosent halda, at oljuvinnan verður tann týdningarmesta.

– Hetta vísir, at norska fólkið er væl upplýst og er í ferð við at síggja, at oljan er á veg út, sigur professarin Jarl Giske á lærda háskúlanum í Bergen, sambært e24.no.

– Trúgva fólk meira upp á fiskin enn oljuna, so hava vit ikki gjørt arbeiði okkara til lítar, sigur samskiftisstjórin Timmy Hansen í áhuga- og arbeiðsgevarafelagnum Norsk olje og gass.

– Fiskur fer helst at vera týdningarmikil fyri Norra í framtíðini, men olja verður týdningarmiklari í langa tíð aftrat. Ongir mótsetningar eru millum hesar vinnurnar, so neyðugt er ikki at menna tær fyri rokningina hjá hvøraðrari, heldur hann.

Sama kanningin varð gjørd fyri tveimum árum síðani. Tá helt meirilutin, at oljuvinnan fór at verða týdningarmiklast fyri Norra í framtíðini. 

10 pst. øking

Meðan vónirnar til fiskivinnnu og aling eru øktar við 10 prosentum seinastu tvey árini, eru vónirnar olju og gass harafturímóti minkaðar við seks prosentum. Sambært SINTEF kann fiskivinnan gerast virðismiklari enn oljan í 2035.

Timmy Hansen heldur kortini, at eitt arbeiðspláss í oljuvinnuni er týdningarmikið fyri samfelagið.

– Hetta er førleiki, sum fer at koma samfelagnum til gagns eisini í framtíðini við teimum avbjóðingum í huga, sum eru knýttar at, hvussu vit skulu kunna framleiða varandi orku, sigur Timmy Hansen sambært e24.no.