Uppskotið sigst hava undirtøku í altinginum, men hevur fingið harðar ábreiðslur frá fleiri átrúnaðarligum bólkum, skrivar bretska blaðið The Guardian.

Silja Dögg Gunnarsdóttir úr Framsóknarflokkinum hevur lagt uppskotið fram.

Sambært uppskotinum verður revsingin fyri umskering av dreingjum undir 18 ár fongsul í upp til seks ár.

Hugskotið til nýggja lógaruppskotið fekk íslendski politikarin, tá hon varð varug við, at umskering av gentum er bannað, meðan umskering av dreingjum er loyvd.

Fyrsta í Evropa

Í viðmerkingunum til uppskotið sigur hon, at umskering av ungum dreingjum er ágangur á rættindi teirra, at inntrivið ikki samsvarar við ST barnarættindasáttmálan og at hetta ofta ber í sær ein heilsuvanda fyri barnið.

Hart orðaskifti er í fleiri londum í Evropa um júst hesi viðurskifti, men onki land hevur tikið stig til at banna inntrivinum.

Harðar atfinningar

Uppskotið hevur elvt til harðar atfinningar frá átrúnaðarligum leiðarum bæði í Íslandi og í restini av Evropa.

Við The Guradian sigur imamurin hjá íslendskum islamum, Ahmad Seddeeq, at lógaruppskotið stríðir ímóti trúarfrælsinum í landinum.

Biskupurin Agnes M. Sigurðardóttir ávarar ímóti, at uppskotið fer at stigmatisera jødar og muslimar.

Leiðarin fyri jødisku kongressuni í Evropa, Moshe Kantor, heldur upp á, at ongi prógv eru fyri, at umskering av dreingjum er skaðilig.

Uppskotið kemur til viðgerðar í altinginum í næstum.