Seinastu tíðina hevur verið skipað fyri ferðaleiðaraskeiði á Fiskivinnuskúlanum í Vestmanna, har 23 fólk hava luttikið.

Mikudagin í farnu viku vóru hesir komandi ferðaleiðararnarnir í Vinnuhúsinum og fingu kunning um ymisk vinnuviðurskifti. Millum annað varð kunnað um, hvørjar uppgávurnar hjá Arbeiðsgevarafeløgunum og vinnugreinafeløgunum í Vinnuhúsinum eru. Harumframt varð kunnað um, hvussu okkara arbeiðsmarknaður er skipaður, í hvørjum vinnugreinum fólk í Føroyum arbeiða, hvussu arbeiðsvirkin vit eru, o.s.fr.

Ferðaleiðaraskeiðið er skipað við 200 undirvísingartímun tilsamans, har umleið tveir triðingar eru á skúlabeinki eitt kvøld um vikuna, meðan seinasti triðingurin er skipaður í nøkrum vikuskiftum sum skeið, vitjanir og túrar.

Áhugin fyri skeiðnum er stórur. Skeiðið byrjaði í september í fjør, og tá freistin at søkja var úti, høvdu 63 umsøkjarar søkt um upptøku.