Sunnudagin 11. februar steðgaði IRF ovninum á Brennistøðini á Hagaleiti í Leirvík og arbeiðið at taka gamla heittvatnsketilin niður er byrjað. Alt innsavnað rusk verður nú ballað við rusk-ballimaskinu, til nýggi ketilin á Brennistøðini væntandi verður tikin í nýtslu í august.                              

IRF skrivaði í fjør undir sáttmála við donsku fyritøkuna Boilerworks um nýggjan heittvatnsketil og hesin er nú komin til Leirvíkar. Talan er um størsta heittvatnsketil í Føroyum. Frá miðum apríl verður nýggi ketilin royndarkoyrdur og væntandi tillagingar gjørdar.

“Gongur alt eftir ætlan, verður brent aftur við fullari styrki í august,” sigur IRF.

Gamli ketilin varð tikin í nýtslu, tá Brennistøðin byrjaði í 1989 og hevur hann havt eina nógv longri livitíð enn upprunaliga væntað.

“Men nú var tíðin komin til eina útskifting,” sigur IRF. Nýggi heittvatnsketilin verður munandi effektivari enn undanfarni og fer IRF at kunnu brenna uml. 72 tons av burturkasti um samdøgrið, í mun til 62 tons í dag. Brennistøðin fer harumframt at kunna koyra í 11 mánaðir út í eitt, áðrenn neyðugt verður at steðga fyri at reinsa skipanina, og tað er eisini ein betran í mun til í dag.

Meðan ketilin verður útskiftur, verður høvið eisini nýtt til aðrar umvælingar og útbyggingar. Eitt nú verður bygt eitt tøknirúm til ketilin og tilhoyrandi skipanir.