Um hálvgum tíggju tíðina í gjárkvøldið kom fyrsta russiska fiskiskipið í ár inná Runavík at umskipa svartkjaft.

Á Faroe Agency, sum er umboð fyri russisku skipini í Føroyum, siga tey, at onnur skip hava verið á Klaksvík og Fuglafirði fyrr í ár, og eitt hevur eisini verið til umvælingar í Havn, men nú byrjar tíðin aftur, tá skipini koma regluliga inn at umskipa.

Fyrr lógu skipini í Føroyum og bíðaðu, meðan eingin fiskiskapur var, men hetta er nú broytt, og øll skipini fara heim, tá einki virksemi er við Føroyar, siga tey á Faroe Agency.

Runavíkar Havn sigur við R7, at í fjør vóru 130 russisk fiskiskip inni á Runavík umframt 90 farmaskip. Tilsamans 1.200 skip løgdu at bryggju í Runavík í fjør, sum var besta árið nakrantíð hjá Runavíkar Havn.

Næsta russiska fiskiskipið kemur á Runavík í annaðkvøld.