Magni Arge, fólkatingslimur, skipar fyri ráðstevnuni, har bæði útlendskir og føroyskir serfrøðingar fara at viðgera tey 17 málini, sum ST í september 2015 setti sær fyri at loysa.

Hesi fevna m.a. um at basa fátækradømi, veita øllum mat, rættin til góða heilsu, betri útbúgving, javnstøðu, burðardygga orku, minni ójavna, veðurlagsátøk og lívið í havinum.

-Ein týdningarmikil partur av hesum risa átaki, er at spjaða boðskapin vítt og breitt, soleiðis at vit bæði saman og hvør sær kunnu gera okkara fyri at betra um heimin, sigur fyriskiparin.

Undirtøkan í Føroyum og Norðurlondum

Á ráðstevnuni verður kunnað um ST-ætlanina, og hvussu tikið verður ímóti henni í Føroyum og Norðurlondum.

Sjóneykan verður serliga sett á heimsmál nr. 14, sum snýr seg um havið og lívið í havinum, ið hevur so stóran týdning fyri Føroyar. 

Skráin fyri ráðstevnuna, ið byrjar kl. 8.45 og endar á middegi, er henda: 

Mogens Lykketoft, fyrrverandi ST-aðalfundar formaður:
Visiónin handan ST-sáttmálan 

Aksel Johannesen, Løgmaður:
Hvussu taka Føroyar av avbjóðingini? 

Anniina Kristinsson, umboð fyri Norðurlendska Ráðharran:
Norðurlendsk átøk og samstørv 

Katherine Richardson, professari í havfrøði:
Burðardygga nýtslan av tilfeinginum í havinum 

Høgni Hoydal, landstýrismaður í fiskivinnumálum:
Large Ocean Nations 

Ásmundur Gudjónsson, stjóri í NORA:
Blue Fashion 

Poul Michelsen, landstýrismaður í uttanríkismálum:
Altjóða leikluturin hjá Føroyum í samband við heimsmálini.