Fimm mál á skránni fyri tingfundin í dag
Tingfundur er í dag klokkan hálvgum tvey, og á skránni er ein triðja viðgerð, tríggjar fyrstu viðgerðir og ein framløga, sum skal vera grundarlag undir einum aðalorðaskifti.
Fyrsta mál á skránni er 3. Viðgerð av uppskoti til ríkislógartilmæli um at seta í gildi fyri Føroyar ávísar broytingar í lov om finansiel stabilitet. Tað má metast at vera eitt “avgreiðslumál”, tí við 2. viðgerð tók eitt samt løgting undir við uppskotinum.
Poul Michelsen, landsstýrismaður fer eisini á tingfundinum at leggja fram eina frágreiðing um skapandi vinnur, og tann frágreiðingin verður grundarlag undir einum aðalorðaskifti, sum verður hósdagin.
Tríggjar 1. viðgerðir eru eisini á skránni fyri tingfundin í dag. Tann fyrsta er av uppskoti hjá Kristinu Háfoss, landsstýriskvinnu, um at broyta lógina um avgjald á framleiðslu og innflutningi. Talan er um eina tekniska broyting, har skotið verður upp at dagføra nøkur vørunummur í sambandi við eina aðra lógarbroyting.
Næsta uppskotið sum fær 1. viðgerð á tingfundinum í dag er eisini ein teknisk lógarbroyting eftir uppskoti frá Kristinu Háfoss, í sambandi við at ein onnur lóg verður broytt.
Seinasta málið á skránni fyri tingfundin er eitt uppskot frá Sambandsflokkinum um eykajáttan til Landssjúkrahúsið, soleiðis at MR-skannarin kann verða brúktur meira.
Øll málini sum fáa fyrstu viðgerð verða beind í fíggjarnevndina.
Mest lisið í farnu viku
Samband
Heygsvegur 8
490 Strendur