Størsti vøksturin í rakstrarinntøkunum kemur frá vøruflutningstænastum, sum vaks við 47,5 pst.

Samanlagt hækkaðu rakstrarinntøkurnar við 57,2 mió. evrum ella 7 pst.

Eimskip kallar árið 2017 eitt “vakstrarár”, har umsetningurin øktist úr 140,5 mió. evrum til 176 mió. evrur. 

“Árið 2017 kann lýsast sum eitt vakstrarár, har vavið, umsetningurin og EBITDA vórðu methøg,” sigur Gylfi Sigfusson, stjóri í Eimskipum.

Hørð kapping í Norðurtalantshavi

Bingjuflutningurin øktist við 4,5 pst., serliga orsakað av vøkstri í innflutninginum til Íslands, Føroya og Noregs og vøkstri í handlinum handan hav.

Umsetningurin av bingjuflutninginum hækkaði til 116, 7 mió. evrur, sum er ein vøkstur upp á 14,7 pst.

Útlitini fyri bingju- og vøruflutninginum í 2018 eru positiv, sigur reiðaríið.

“Góður vøkstur hevur verið í inn- og útflutninginum úr Íslandi í ársins fyrstu seks vikum, og útlitini fyri Føroyar og Noreg eru stabil,” sigur Sigfusson.

Flutningurin handan hav fer væntandi at økjast, nú siglt fer at verða eina ferð um vikuna, meðan roknað framhaldandi verður við harðari kapping í Norðuratlantshavi.

Eimskip, ið rekur 22 skip tilsamans, væntar eitt EBITDA - rakstraravlop - í 2018 upp á millum 60 mió. og 65 mió. evrur.