Havnar Sjónleikarfelag fekk 100.000 í føðingardagsgávu
10. februar vóru 100 ár liðin síðani felagið á fyrsta sinni lýsti við "aftenunderholdning".
Seinnapartin í dag handað Annika Olsen, borgarstjóri í Havn, umboðum fyri Havnar Sjónleikarfelag ein kekk á 100.000 krónur í sambandi við at felagið er 100 ár.
Annika Olsen hugleiddi í sambandi við handanina eitt sindur um, at hetta at ganga í “teatur” í Havn veruliga er avgamalt, helst eini hálvtriðja hundrað ár, men at “komedian” og sjónleikurin ikki tóku veruliga dik á seg fyrrenn í 1880'unum.
Hon nevndi eisini, at lesir ein bløð og tíðarrit frá teirri tíðini sæst, at helst hevur sjónleikurin havt álvarsligan brodd, tí mong av “fínara borgaraskapinum” í Havn tóku sær tað nær - serliga av “komediunum”, og østu seg upp um, at ungdómur og vaksin spiltu tíðina uppá beran stuttleika.
“So longu tá hevur sjónleikurin verið við til at lyfta stemningin upp í býnum - og ein kann bara ímynda sær, hvussu stóran týding tað hevur havt fyri kjakið, humørið og harvið almannaheilsuna,” segði Annika Olsen m.a.
Havnar Sjónleikarfelag varð stovnað sum “amatørteatur” í 1918, m.a. sum úrslit av arbeiðnum hjá Rasmussi Effersøe, sum mynd enn hongur av yvir leikpallinum saman við orðunum "Til gaman og álvara".
8 ár eftir at felagið varð stovnað varð Sjónleikarhúsið tikið í nýtslu og við tí mentust møguleikarnir fyri sjónleiki stórliga.
“Tað eru nú 100 ár síðan, at lýst varð til "aftenunderholdning" tann 10. februar 1918. Síðan tá hava tit í Havnar Sjónleikarfelag verið partur av mentan og undirhaldi fyri allar føroyingar, bæði til gamans og álvara,” segði Annika Olsen.
“Eg veit at gávan kemur á eitt turt stað, men eg veit eisini, at tit vita best, hvar hon ger størstu og bestu nyttuna,” segði borgarstjórin millum annað, áðrenn hon handaði Karini Djurhuus, forkvinnu í Havnar Sjónleikarfelag gávukekkin.
Mest lisið í farnu viku
Samband
Heygsvegur 8
490 Strendur