Earth Hour 2018 verður leygarkvøldið 24. mars kl. 20:30-21:30. Henda tíman sløkkja vit ljósið og seta sjóneykuna á jørðina.

Earth Hour er tímin, har ið ein verður mintur á, at vera góður við ta einastu jørðina, vit hava.

Búmerkið “60+” umboðar teir 60 minuttirnar, ið vit sløkkja ljósið, men eisini tíðina, ið kemur eftir hetta, har vit skulu vera umhvørvisvinarlig.

Í sambandi við Earth Hour skipar Tórshavnar Kommuna fyri einum hugnaligum tiltakið í Tinghúsgarðinum hetta sama kvøld frá kl. 20.00-21.30

Evnið á Earth Hour í ár er “Connect2Earth”, og í Havn fara vit at varpa ljós á lívfrøðiligt margfeldi í Føroyum. Magnus Gaard, lívfrøðingur, lærari og rithøvundur fer at hugleiða um evnið.

Turið Horn, forkvinna í Náttúru- og Umhvørvisnevndini heldur røðu. Eisini fara kórið Xperiment og Marius Ziska at framføra góðan tónleik.

Tórshavnar Kommuna bjóðar kaffi og te at hita seg við, men í ár verða fólk vinarliga biðin um at taka sín egna kopp við. Hetta fyri at broyta vanan við at brúka einnýtiskoppar. Vit gera eina “koppvelting”!

Meðan Earth Hour er, verða stórir partar av gøtuljósunum í Tórshavn sløkt og øll gøtuljósini í Nólsoy. Tískil heitir kommuna á fólk um at ansa sær í myrkrinum.

Ferðslan
Í samband við tiltakið verður vegurin stongdur frá Sverrisgøtu oman á Vaglið, millum kl. 20:00-22:00.

Sum nakað serligt koyra ókeypis bussar til og frá Kollafirði/Kaldbak og Velbastað/Kirkjubø, sí ferðaætlan niðanfyri. Til ber at melda seg til bussin, við at ringja til Visit Tórshavn, áðrenn fríggjadagin 23. mars kl 16:00 á tel: 30 24 25.

Úr Kollafirði 19.00
Úr Kaldbak 19.15
Í Steinatúni 19.35 
Úr Steinatúni 22.00
Í Kaldbak 22.20
Í Kollafirði 22:35

Úr Kirkjubø 19:30
Úr Velbastað 19.40
Í Steinatúni 19.55
Úr Steinatún 22.00
Í Velbastað 22.15
Í Kirkjubø 22.25