Svartkjafturin er á veg inn í Føroyskan sjógv. Tað er altíð soleiðis. Næstan uppá dato í apríl. Nú eru sera nógv skip sum royna. Vit fingu sendandi eina mynd, sum vísur skip og nøvn.

Sum myndin vísur, so er meginpartin av skipunum útlendsk.

Tá so nógv skip eru á so avmarkaðum øki, er trupult at royna. Tað ger, at fiskiskapurin ikki er eins góður og hann kundi verið. Fyrr í ár gjørdi Fiskimálaráðið avtalu við Ísland, sum loyvdi fleiri Íslendskum skipum at fiska í Føroyskum sjógvi. Tað er greitt at ein slík avtala ger at Føroysk skip fiska eitt sindur minni enn tey annars høvdu kunna fiska.

Somuleiðis er greitt, at teir sum fiska Gullaks hava verri umstøður, tí teir noyðast at halda seg uttanfyri øll hasi skipini sum myndin vísur. Gullaksin fiska teir niðri á botni, meðan svartkjafturin er uppi í sjónum. Tí minkar veiðan eisini hjá teimum.

Stórsti trupulleikin er tó at Havsbrún ikki klárar at taka ímóti øllum Svartkjaftinum. Tí bíða skipini eftir landingartørni. Tað tekur upp í 2-3 dagar í løtuni. Meðan skipini liggja, lækkar góðskan á fiskinum. Prísurin skipini fáa er í mun til góðsku og tað Havsbrún fær burtur úr er eisini í mun til góðsku. Tí er rættuliga greitt, at samfelagið missur pengar á hendan hátt.

Tað eru ongi útlit fyri at støðan verður broytt.