Bretska oyggin í Atlantshavi, Bermuda, er higartil einasta landið av teim 26 í heiminum, ið fyrst hevur samtykt samkynd “hjúnalag”, og so tikið loyvið aftur.

Á Bermuda er bert 100 km2 til víddar (á stødd sum Borðoy), er lágskattland og tryggjar teim 60.000 íbúgvunum eitt høgt livistøði, loyvdi í fjør samkyndum at giftast, men broytti hesa samtykt aftur fyri nøkrum vikum síðan.

Tað var hægstirættur á Bermunda, sum í fjør kom við tí dómsúrskurði, at oyggin skuldi loyva samkyndum at giftast, hóast ein meiriluti av veljarunum á fólkaatkvøðu hevði atkvøtt nei.

9 mánaðir eftir, at hægstirættur í Hamilton, høvuðstaðnum á oynni, hevði givið loyvi, samtykti lóggávutingið á oynni lógina Domestic Partnership Act, sum broytti “hjúnalag” til “samkynd parlag”, ið juridiskt gevur somu rættindi.

LGBT fanst at bretsku stjórnini í London fyri at góðtaka hetta afturstig hjá samkyndum og fyri ta politisku rørslu, ið drívur ætlanir teirra kring heimin.

Theresa May harmaðist lógarbroytingina, men Uttanríkisráðið í Westminster sigur seg ikki kunna leggja seg út í lóggávuna hjá heimastýrda Bermuda.

Ein hurð aftur, onnur hurð upp

Í Delhi gekst LGBT betur enn á Bermuda. Í India fagnaðu samkynd broyting í eini lóg frá 1871. Tá samtykti Bretland sum hjálandaveldi yvir India grein 377 í indisku revsilógini, ið bannaði “holdsligum sambandi í stríð við náttúrulógir millum menn, kvinnur og djór.” Revsingin fyri brot kundi vera upp í 10 ár.

Henda indiska lógin byggir annars á bretska lóg frá 16.øld. Hon varð enntá staðfest aftur so nýliga sum í 2013. Men nú, bert 5 ár seinni, og eftir at lógin ikki hevur verðið brúkt nevnivert nýliga, helt tjóðartingið í Delhi tíðina vera búna til at seta hana úr gildi.

LGBT hevur ført fram sum argument fyri at avtaka lógina, at hon hevur darvað eftirliti við og grøðing av HIV/AIDS, mest vanlig millum samkynd.

Eisini hevur felagskapurin harmast, at forboð móti kynsligum sambandi millum fólk av sama kyni hevur givið brotsfólkum høvi til at kroysta pening úr samkyndum fólkum við hóttan um at avdúka alment og fyri løgregluni.