“Frískúlin Keldan hevur skyldu at fylgja ásetingunum í lógini um frískúlar, og viðtøkurnar og undirvísingarætlanin fyri skúlan eru góðkendar av landsstýrinum.”

Tað segði Rigmor Dam, landsstýriskvinna, á tingfundinum í dag, tá hon svaraði einum munnligum fyrispurningi frá Sonju Jógvansdóttir, løgtingskvinnu.

Sonja Jógvansdóttir spurdi, hvat eftirlit Mentamálaráðið hevur við frískúlanum Kelduni, og hvussu ofta eftirlitsvitjan hevur verið á skúlanum.

Rigmor Dam svaraði, at umboð fyri Mentamálaráðið hava verið tvær ferðir á vitjan á skúlanum síðani skúlin byrjaði skúlaárið 2010/11, og næsta vitjanin verður nú í mai mánaði.

Sonja Jógvansdóttir spurdi eisini, hvussu landsstýriskvinnan tryggjar, at §2 stk. 3 í fólkaskúlalógini verður hildin á nevnda frískúla? Henda lógarregla sigur, at fólkaskúlin skal í sátt og samvinnu við foreldrini hjálpa til at geva næmingunum eina kristna og siðalagsliga uppaling. Hann skal við støði í heimligari mentan menna kunnleika næminganna um føroyska mentan og hjálpa teimum at fata aðrar mentanir og samspæl manna við náttúruna. Hann skal búgva næmingarnar til innlivan, samavgerð, samábyrgd, rættindi og skyldur í einum fólkaræðisligum samfelag. Undirvísing og gerandislív skúlans eiga at vera grundað á andsfrælsi, tollyndi, javnvirði og fólkaræði.

Rigmor Dam svaraði, at hetta er treyt fyri, at góðkenna skúlar, og Mentamálaráðið hevur við støði í hesum góðkent frískúlan Kelduna, tí mett varð, at skúlin leyk hesar treytirnar.

Sonja Jógvansdóttir spurdi at enda, um landsstýriskvinnan metir at nóg gott eftirlit er við frískúlanum Kelduni?

Rigmor Dam svaraði, at Mentamálaráðið ásannar, at eftirlitið við bæði frískúlum og fólkaskúlum kundi verið betri.

Hoyr alt orðaskiftið her.