Australia bjóðar hvítum suðurafrikanum skundvisa
Australski ráðharrin fyri innlendis-, tilflytara- og marknarmálum, Peter Dutton, beyð herfyri forfylgdum hvítum suðurafrikanum skundvisa at flyta til Australia, um tey føla seg jagstrað heima. Hetta tilboð galt serliga hvítar bøndur í SA.
Suðurafrika er við at fáa øvugt apartheid, har tey hvítu eru fyri vanbýti. 1/4 av teim hvítu liva nú í fátækradømi. Tey svørtu fáa flestu og bestu størvini. Hvít fólk við góðum inntøkum verða enn búgvandi í landinum. Men fátæk hvít hava ikki ráð til at rýma og ikki útbúgving at klára seg í EU, USA, NZ ella Australia.
Almenn hagtøl vísa, at 40 ára langi bardagin fyri og ímóti apartheid kostaði 5-6.000 mannalív, flestu svørt, ið gjørdu vápnaða mótstøðu móti hvítu stjórnini.
Í1994 fekk Suðurafrika svart meirilutastýri við ANC sum størsta flokki og Nelson Mandela sum forseta. Bæði tjóðartingið og forsetin vórðu vald við vanligum valrætti fyri øll, og ANC hevur havt einflokkavald síðan.
Longu nú, bert 24 ár eftir svart meirilutastýri í SA, eru 4.000 hvítir bøndur, konur og børn teirra dripin av svørtum brotsmonnum. Stjórnin letur sum einki.
ANC er byrjað at endurtaka brølaran hjá Robert Mugabe norðanfyri, ið síðan 1990 hevur rænt jørðina frá teim tá 4.000 hvítu bøndrunum (nú eru bert 200 eftir). Tað hevur broytt Zimbabwe frá “breyðkurvini” til biddaraskálina í Afrika.
Jacob Zuma hevur júst lagt frá sær, og Cyril Ramaphosa tikið við sum forseti í Suðurafrika. Grundlógin er broytt til at taka jørðina frá teim 40.000 hvítu bøndrunum uttan endurgjald, ið er reinur stuldur. Helst fáa ANC-politikarar og ikki svartir knæbøndur teir flestu og bestu garðarnar - júst sum í Zimbabwe.
Suðurafrikanska tjóðartingið samtykti fyri páskir at loyva ognartøku av jørð.
Tað hevur vakt vreiði millum ANC politikar, at australska stjórnin býður hvítum forfylgdum bøndrum skundvisa. Men australski ráðharrin, Peter Dutton, hevur sagt alment í Radio 2GB-4GB, at australsk lóg loyvir játtan av visum til “fólk, ið verða forfylgd – uttan mun til, um tað er av trúarávum, húðaliti ella øðrum.”
Stjórnin í Suðurafrika hevur úttalað, at “Hvít fólk hava onga grund at óttast, hóast grundlógin nú er broytt, so vit hava loyvi at leggja hald á jørð uttan gjald til at javna landsins ognir, so SA bøtir um gjørdan órætt í farnum tíðum.”
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur