Seinastu sjey árini – síðani 2011 – hevur felagsskapurin, Atlantic Mission, gjørt evangeliseringsferðir við trúboðanarbátinum, JUVEL II, til grannalond okkara. Ferðir hava verið gjørdar til Hetlands, Orknoyggjar, Hebridurnar, Íslands og Noregs.

Høvuðsendamálið við Juvel II er at sigla í Grønlandi við gleðiboðskapinum, har báturin er umleið 4 mánaðir hvørt summar.

Áðrenn farið verður til Grønlands, hevur Atlantic Mission lænt bátin til hesar ferðir til grannalondini.

Í ár er avgerð tikin um at fara til Orknoyggjar við juvél II. Ferðin verður í fyrru helvt av mai mánað. Hetta er triðja vitjanin hjá Juvél II í Orknoyggjum.

Tað verða 15 fólk í ferðalagnum við Juvél II suður til Orknoyggjarnar.  Skipari verður Gullak Gullaksen úr Leirvík, sum eisini var skipari á ferðini til Norra í fjørð. Farið verður av Havnini mikudagin 02. mai. Vanligt hevur verið at hava eina farvælløtu sama dag, sum farið verður avstað, og soleiðis verður eisini í ár, men klokkutíðin verður lýst nærri seinni.

Tað tekur millum 20 og 24 tímar at sigla til Kirkwall, og avtalað er gjørd við havnamyndugleikarnar í Kirkwall, at Juvél II leggur til bryggju fríggjadagin 04. mai kl.18:00. Tá verður almenn móttøka á bryggjuni, har eitt alment umboð fyri Orknoyggjar tekur í móti við røðu.

Ein neyv ferðaætlan er gjørd fyri vitjanini, har ætlanin er at vitja á trimum støðum við skipinum: Kirkwall, Stromness og Lyeness á oynni Hoy. Men onnur støð verða eisini vitjaði við bilum og ferju. Møti verða bæði í landi og umborð á Juvel II, har tiltøk av ymiskum slagi verða bæði fyri børn, ung og vaksin.

STROMNESS:

Mikudagin 09. mai kemur skipið til Stromness og verður liggjandi har til sunnudagin 13. mai, tá vitjanin endar. Leygarkvøldið 12. mai verður boðið til bønar- og lovsangsløtu umborð á Juvél II, og sunnudagin 13. mai kl.16:30 verður vitjað í Frelsunarherinum, og kl.19:30 verður lovsangsløta í býráðshøllini í Strømness, sum samstundis verður ein farvælløta, tí sama kvøld liggur leiðin aftur til Føroyar.

Kristiliga Tíðindatænastan v/pjd
gjaranes@gmail.com
Skrivað : Poul Jóhan Djurhuus 17.04.2018

Framsíðan á faldaranum, sum verður býttur út áðrenn skipið kemur