Tórshavnar kommuna átti næstan hálva milliard á bók
Nógvir pengar eru í kommunukassanum í Havn, sambært Anniku Olsen, borgarstjóra.
Á býráðsfundi í Havn, týskvøldið, legði Annika Olsen, borgarstjóri, fram ársroknskapin fyri 2017.
Annika Olsen segði, at stórur búskaparvøkstur hevur verið í Føroyum seinastu árini, og hesin vøksturin sæst aftur í roknskapinum hjá Tórshavnar kommunu. Inntøkurnar í 2017 vóru íalt 970 mió. krónur. Tað eru heili 12% hægri enn mett varð í fíggjarætlanini hjá kommununi.
Samlaðu rakstrarútreiðslurnar í 2017 vóru 693 mió. krónur. Tað er ein vøkstur í mun til undanfarna roknskaparár. Fleiri orsakir eru til tað, segði Annika Olsen. Hon vísti millum annað á, at búskaparvøksturin seinastu árini hevur havt við sær eina tilflyting, soleiðis at fólkatalið í farna ári á fyrsta sinni kom upp um 21.000 borgarar.
Nógv virksemi var í 2017, og kommunan gjørdi íløgur fyri tilsamans 198 mió. krónnur. Nýttar vóru 67,5 mió. krónur til Skúlan á Fløtum. Aðrar 21,2 mió. krónur fóru til Musikkskúlan og 1 mió. krónur til at gera Dagstovnin í Kollafirði lidnan.
57,6 mió. krónur vórðu nýttar til ítrótt, og kommunan varð fríðkað fyri 11,3 mió. krónur.
Tórshavnar havn hevur í 2017 gjørt íløgur fyri 75 mió. krónur.
Úrslitið hjá kommununi aftaná íløgur var eitt avlop á 52 mió. krónur.
Fíggjarstøðan góð
Fíggjarstøðan hjá Tórshavnar kommunu er góð. Tøkur peningur við ársskiftið var 438 mió. krónur. Av hesum stóðu 231 mió. krónur inni hjá Tórshavnar kommunu og 207 mió. krónur hjá Tórshavnar Havn.
“Orsøkin til nógv innistandandi við ársskiftið eru fleiri. Inntøkurnar hava verið hægri enn mett, íløgur eru fluttar fram - umframt lántøka í árinum,” segði borgarstjórin á býráðsfundinum týskvøldið.
Hon minti á, at hóast gongdin hevur verið góð seinastu árini, so kunnu tíðirnar skjótt broytast, og tað eingur kommunan altíð at vera fyrireikað til.
“Vit hugsa okkum væl um, soleiðis at vit eisini í komandi tíðum eru ein kappingarfør kommuna,” segði Annika Olsen, borgarstjóri.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur