Magn: Lova okkum at prógva tað
Magn vil sleppa at prógva, at eitt liberaliserað el-net fer at elva til lægri prísir.
“Lova okkum at prógva tað.” Tað sigur Hendrik Egholm stjóri í Magn, í svari til Hákun Djurhuus, stjóra í SEV, sum í Degi og Viku mánakvøldið segði seg vilja hava prógv fyri, at eitt liberaliserað el-net fer at elva til lægri brúkaraprísir.
“Lova okkum at framleiða grøna orku, flyta hana á netinum hjá SEV fyri eitt hóskandi netgjald og selja hana beinleiðis til brúkararnar,” sigur Hendrik Egholm. Hann vísir á, at Magn hevur júst tikið endaliga stigið inn á grøna orkumarknaðin við at keypa meirilutan í p/f Demich, sum er fremsti føroyski útbjóðarin av hitapumpuloysnum.
“Sleppa vit at gera tað, fara Magn og Demich í felag at kunna bjóða føroysku brúkarunum
orkukonseptloysnir, sum við vissu fara at verða kappingarførar í prísi,” sigur Hendrik Egholm.
“Lova okkum nú at prógva tað, um ikki øll uppáhaldini um kappingarføri ella vantandi kappingarføri bara skulu standa eftir sum tømt tos,” sigur hann.
Sama sum á tele økinum
Hendrik Egholm sigur, at áðrenn latið varð upp fyri kapping á telemarknaðinum, var mótstøðan stór frá Føroya Tele, og onki skuldi bera til.
“Allur ivi tí viðvíkjandi bleiv tó ógvuliga skjótt mótprógvaður. Kappingin hevur fingið prísirnar niður, og í dag hava Føroyar ein telemarknað, sum bæði tøkniliga og viðvíkjandi nýskapan gongur á odda í heimshøpi,” sigur hann.
Hendrik Egholm heldur tað vera gott, at SEV nú bjóðar seg at keypa avlopsorkuna frá privatfólki og fyritøkum, ið seta sær smá orkuverk upp, men í samlaða orkuroknistykkinum fer slík privatframleiðsla ongantíð at muna tað stóra, tí íløgur í privata orkuframleiðslu eru dýrar, og tað er bara í avmarkaðum parti av føroysku húsarhaldunum og vinnubygningum, at tær lata seg gera.
“Tí fer effektin av nýggja átakinum hjá SEV í ógvuliga lítlan mun at síggjast aftur í øktari grønari orkuframleiðslu,” sigur Hendrik Egholm.
Tað fer hon hinvegin at gera, um SEV eisini fer at lata netið upp fyri nýggjum stórframleiðarum av grønari orku,” sigur hann.
Velur SEV hinvegin ikki at lata netið upp fyri nýggjum stórframleiðarum, so fer tað heldur ikki at eydnast at røkka málsetninginum um at fáa alla orkunýtslu á landi grøna í 2030, sigur Hendirk Egholm.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur