Tvillingar doyðu av hita, tí pápin gloymdi teir í bilinum
Fimm mánaðar gamlar tvillingar doyðu av hita, tá pápin gloymdi teir í bilinum. Bilar gerast sera heitir, tá sólin sær. Tað er nakað at hugsa um, tá fólk ferðast í bili. Nógvastaðni er ólógligt at lata børn verða einsamøll í bili.
Í statinum Virginia í USA koyrdi ein pápi mammuna til arbeiðis og fór síðan heimaftur. Hann fór síðan at sova, men gloymdi børnini eftir í bilinum.
Konan ringdi til grannan kl. 14 sama dag og bað grannan vakja mannin. Tá funnu tey útav at børnini vóru gloymd eftir í bilinum. Tað var sera heitt og boð vóru send eftir sjúkrabili. Men tá var longu ov seint. Drongurin doyði beinavegin tá komið var til sjúkrahúsið, meðan gentan doyði fáar tímar aftaná.
Børnini vóru tvillingar og vóru bara 5 mánaðar.
Løgreglan sigur at ongin orsøk er at halda at talan er annað enn óhapp.
Í USA doyggja í miðal 37 børn árliga av hita, tí tey eru gloymd í bili. Tey flestu eru heilt smá. Men børn upp til 6 ára gomul kunnu eisini doyggja. Í fjør vóru 12 børn yngri enn 1 ár, 8 vóru 1 ár, 7 vóru 2 ár, 5 vóru 3 ár, 3 vóru 4 ár og 1 var 5 ár og eitt var 6 ára gamalt, sum doyðu av hita í bili.
Umleið helvtin av teimum børnunum sum doyðu í bili frá 1998-2017, eru av misgávum gloymd eftir í bilinum av vaksnum. Eini 28% av teimum sum doyðu, vóru sjálvi farin inn í bilin. Og 17% av børnunum sum doyðu, vóru har, tí onkur hevði latið tey verða har við vilja.
Tað skal ikki nógvur hiti til. Í flestu førum hevur hitin verið hægri enn 25 stig. Men onkur børn doyðu í bert 12 hitastigum.
Ivaleyst er skilagott at ansa sera væl eftir tá fólk fara at ferðast. Og tað er avgjørt ræðandi at helvtin av teimum sum doyggja, eru av misgávum gloymd í bilinum!
Tað búgva nógv fólk í USA og tí eru nógv hagtøl. Ein heimasiða sum hevur hagtøl um hetta er: http://www.noheatstroke.org
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur