FULLTRÚASTARV Á LØGMANSSKRIVSTOVUNI
Eitt spennandi starv sum fulltrúi á Løgmansskrivstovuni er leyst at søkja
Starvið:
Starvið fevnir í høvuðsheitum um at taka sær av samskiftismálum og ritarauppgávum umframt ymiskum málsviðgerðum og fyrisitingarligum uppgávum í sambandi við ábyrgd løgmans sum stjórnarleiðari.
Tann setti fer at ráðgeva í samskiftismálum, skriva røður, røkja heimasíður, umframt at traðka til, tá tað snýr seg um at fyrireika tiltøk og fyrisitingarlig mál. Harafturat verður hon/hann við í arbeiðinum at fremja uppgávur hjá Løgmansskrivstovuni at samskipa og fylgja upp mál landsstýrisins og standa fyri tvørgangandi verkætlanum, ið fevna um ábyrgdarøki hjá fleiri landsstýrisfólkum.
Arbeiðsøkið á Løgmansskrivstovuni er sera breitt, og tí arbeiða starvsfólk vanliga tvørtur um fak- og deildarmørk.
Faklig førleikakrøv:
Vit vænta, at umsøkjarar hava útbúgving frá hægri lærustovni í t.d. samfelagsfrøði, miðlafrøði, búskaparfrøði, fyrisitingarfrøði. Tað er ein fyrimunur, um umsøkjarar hava viðkomandi royndir.
Persónlig førleikakrøv
Vit vænta, at tú, sum søkir, umframt útbúgving frá hægri lærustovni:
· hevur áhuga og innlit í samfelagsviðurskifti,
· dugir væl at skriva og samskifta á føroyskum og enskum máli,
· ert skjót/skjótur at seta teg inn í nýggj fakøki,
· hevur politisk tev,
· ert ágrýtin og ikki bangin fyri at royna nakað nýtt,
· ert fleksibul og strukturerað/ur, og
· dugir væl at samstarva, ert nýhugsandi og dugir at arbeiða sjálvstøðugt
Løn og setanartreytir
Starvið verður sett sambært sáttmála millum Fíggjarmálaráðið og Búskapar- og Løgfrøðingafelag Føroya ella viðkomandi fakfelag.
Setanarøkið fevnir um Løgmansskrivstovuna, hini stjórnarráðini og stovnar undir stjórnarráðunum. Tænastustaðurin er í løtuni Løgmansskrivstovan.
Umsókn:
Umsóknir við upplýsingum um útbúgving, lívsrensli og øðrum skulu sendast til:
Løgmansskrivstovan,
Tinganes,
Postrúm 64,
110 Tórshavn
Ella: info@tinganes.fo
Umsóknin skal vera okkum í hendi í seinasta lagi 30 november 2020 kl. 12.00. Starvið verður sett 1. januar 2021 ella eftir nærri avtalu.
Allar umsóknir verða viðgjørdar í trúnaði.
Møguligir umsøkjarar eru vælkomnir at venda sær til Páll Holm Johannesen, teldupostur: pall@tinganes.fo, telefon: 551040, at fáa nærri upplýsingar um starvið.
Samband
Heygsvegur 8
490 Strendur