Ein av mínum yndis vísmonnum er Walter Williams, amerikanskur professari (svartur) í samfelags- og búskaparfrøði á Mason University, og rithøvundur.

Tað, ið fekk Williams at hugleiða um, hvussu ójavnt er býtt millum manna, var tá onkur gramdi seg um, at svørt og spansktmælt í USA eru 32% av landsins íbúgvum, men tey umboða 52% av øllum fongslaðum, og at kvinnur umboða 20% av øllum tjóðartingslimum, men bert 5% av virkisleiðarum eru kvinnur.

Williams er ósamdur í, at øll fólk eru líka, og skrivar, at tey verða aldri líka. Professarin heldur tað vera púra burturvið, at summi krevja, at hitt almenna við makt skal tvinga øll til at fáa somu úrslit uttan mun til evni, hug og ídni.

Sum dømi nevnir Williams, at jødar telja bert 3% av øllum amerikanum, men jødar hava vunnið 35% av øllum Nobel-virðislønum í USA. Jødar telja bert 0,2% av heimsins íbúgvum, men 22,5% av Nobel-vinnarum hava verið jødar. “Torir nakar at kalla norsk/svensku Nobel-nevndina rasistiska,” spyr Williams.

Eisini vísir Williams á, at bert 13% av øllum amerikanarum eru svartir, men upp í 84% av topp kurvabóltsleikarum í USA eru svartir við hægstu inntøku. 67% av fremstu amerikanskum fótbóltsleikarum í fjør vóru svartir. Rasisma?

Hví spæla so fáir svartir baseball, enn færri íshockey og nærum eingin talv?

Williams fer longur: Hví fáa so nógvar kvinnur úr Laos, Samoa og Vietnam, búsitandi í USA, undirlívskrabba? Hví fáa Pima-indianarar í Arizona flestu tilburðir av sukursjúku í heiminum, og næstan bert hvít fáa systiska fibrosu?

Jú, ójavnt er býtt, hugleiðir Williams professari víðari: Hví fáa menn í USA við uppruna í Suðurasia so sjáldan og afro-amerikanarar so ofta prostatakrabba?

Ein australsk kanning sigur, at hávar drepa lutfalsliga 9 ferðir fleiri menn enn kvinnur. Hví raka snarljós 6 ferðir oftari menn enn kvinnur? Av teimum, ið verða dripin av snarljósum, eru 82% menn. Er eingin rættvísi til?

Svarti professarin í samfelags- og búskaparfrøði á Mason University spyr síðst í greinin, hvussu lítið politikarar kunnu gera við at tvinga øll at verða líka ímóti okkara vilja, og at býta alt javnt, bæði tað góða og tað ringa?

Lógin kann tryggja øllum javnstøðu til somu møguleikar, men ikki somu úrslit.