Føroya Fólkaháskúli hevur sum endamál at menna føroyskt mál, siðmenning og mentan. Til várs ynskja tey at leggja serligan dent á list og mentan á teimum skeiðunum, sum skipað verður fyri. Málbólkarnir eru ung, vaksin, familjur og pensionistar. Tað skrivar Føroya Fólkaháskúli á sínum facebook vanga í samband við at tey heita á fólk um, at koma við uppskotum til skeið til várið 2020. 

Øll, sum hava skeiðsuppskot eru vælkomin at senda tey til Hedvig Westerlund-Kapnas, háskúlastjóra á teldupost mailto:haskulin@haskulin.fo í seinasta lagi 3 november 2019.

Uppskot kunnu eisini sendast til Føroya Fólkaháskúla, Háskúlavegur 14, 100 Havn.
Í uppskotinum skal standa:
Navn á skeiðinum
Málbólkur
Longd
Uppskot til dato
Krøv til tilfar og høli
Ein stutt lýsing av endamáli og innihaldi (50 orð)
Ein stutt lýsing av læraranum (50 orð)
Hví júst hetta skeiðið hoyrir til á Føroya Fólkaháskúla?

Í fyrru helvt av november verður so valgt millum innkomnu uppskotini, og samband verður tikið við læraran at gera nærri avtalur. Øll, sum hava sent uppskot inn, fáa svar í november. 

Háskúlin kann velja frítt millum innkomnu uppskotini, velja okkurt heilt annað ella einki. Vit leggja dent á fjølbroytni, góðsku og mentanarprofil og bjóða eisini nýggjum hugskotum og normbrótarum vælkomnum, skrivar Føroya Fòlkaháskúli.