Eftir øgiligt drama í Vestmanna vann H71 spennandi og jøvnu FM-finaluna á VÍF, og tryggjaði sær eitt gott útgangstøði áðrenn seinnu finaluna leygardagin.

Dysturin var javnur allur sum hann var, og liðini skiftust um at vera frammanfyri. Tað var ongantíð fleiri enn trý mál á muni, men fyri tað mesta stóð á jøvnum ella var talan um leiðslu upp á eitt mál.

Tá bert ein minuttur var eftir avgjørdi Peter Krogh dystin við einum undirhondsskoti. VÍF tók time-out, tá hálvur minuttur var eftir, men tað eydnaðist ikki at fáa útjavnandi málið, og H71 hevur nú góð kort á hondini í dystinum um FM-heitið.

Onnur finalan verður spæld leygardagin í Hoyvíkshøllini, og vestmenningar skulu vinna, um talan skal verða um ein triðja og avgerandi dyst.

Tað var H71, ið byrjaði dystin betur, og tá seks minuttir vóru spældir vóru hoyvíkingarnir á odda 5-2. VÍF arbeiddi seg kortini so líðandi inn í dystin, og kom upp á javnleik upp á eina lítla løtu.

Vestmenningarnir tóku síðan yvir, og Mladin Mjerimacka í VÍF-málinum bjargaði ferð eftir ferð og hjálpti liðfeløgunum at leggja VÍF framum. Tá 18 minuttir vóru spældir var munurin trý mál, men H71 vann seg uppaftur á javnt, og tá væl spældi og ferðmikli fyrri hálvleikurin var liðugur, og liðini fóru í umklæðingarrúmini, var støðan 13-13.

Seinni hálvleikur var sera javnur, og liðini fylgdust allan vegin. Onkuntíð sá út til, at heimaliðið skuldi fara avstað við sigrinum, men tað skifti skjótt, og so var H71 omaná.

Mladin Mjerimacka stóð ein góðan dyst, og framdi fleiri stórar bjargingar síðstu løtuna, men tað varð kortini stórskjúttin hjá H71, ið fekk síðsta málið og orðið.

VÍF-H71 27-28 (13-13)