Hvast orðaskifti á tingi um Landsbankan
Ein munnligur fyrispurningur frá Jørgeni Niclasen til Kristinu háfoss um Landsbanka Føroya elvdi í morgun til sera hvast orðaskifti í løgtinginum.
“Tað er ikki mín fatan, at Landsbankin er komin við skeivum upplýsingum.” Tað segði Kristina Háfoss, landsstýriskvinna, tá hon í morgun svaraði einum munnligum fyrispurningi frá Jørgeni Niclasen, løgtingsmanni.
Jørgen Niclasen spurdi, hvat landsstýriskvinnan helt um tað, at Landsbankin hevði sent eitt tíðindaskriv út, við skeivum upplýsingum. Hann spurdi eisini millum annað hvat nýggi samskiftisráðgevin hjá Landsbankanum kostaði.
Svaraði ikki ítøkiliga
Kristina Háfoss, svaraði, at samskiftisráðgevin er á lønarstigi 6 í lønarsáttmálanum hjá BLF. Hon segði tó ikki, hvat hetta merkti í krónum og oyrum.
Kristina Háfoss fanst samstundis at tí sum hon kallaði “áhaldandi álopunum frá Jørgeni Niclasen á Landsbankin”.
“Kom heldur og verð við til at byggja okkara land upp, heldur enn at bróta niður,” segði hon.
Jørgen Niclasen svaraði, at Landsbankin er ein óneyðugur stovnur, sum kostar 10 mió. krónur, og hann undraðist á, at tað ikki skal vera loyvt at finnast at stovninum. Og hann segði seg hava nógv at finnast at:
“Hóast ratingin frá Moodys er tann sama, so hevur mann klárað at lánt pengar í 2017 við meira enn dupult so høgari rentu, sum Gjaldstovan kláraði at lána fyri í 2016,” segði hann.
“Karaktermorð” og “gambling”
Kristina Háfoss kallaði hetta ósannindi, sum Jørgen Niclasen segði.
“Vit hava samanlagt havt eitt avkast av gjaldførinum fyri 300 mió. krónur, og stóran part av undirskotinum í 2018 hava vit vunnið innaftur í 2019,” segði hon.
Hon segði, at stovnurin kostar ikki 10 mió. krónur, og at talan er ikki um ein nýggjan stovn, tí somu fólkini sótu á Gjaldstovuni og gjørdu tað sama arbeiðið, áðrenn Landsbankin varð stovnaður.
Jørgen Niclasen svaraði, at um úrslitini hava svinga so nógv, sum landsstýriskvinnan segði, so er tað prógv um at mann “gamblar” við pengunum, heldur enn at halda seg til tryggar íløgur.
Jørgen Niclasen segði eisini, at Kristina Háfoss hevði einki annað forsvar enn karaktermyrðing av hansara persóni, og at tað hevði Tjóðveldi gjørt út í eitt í 15 ár. Hann segði eisini, at landsstýriskvinnan tordi ikki at svara spurninginum um, hvat nýggi samskiftisráðgevin kostaði.
Kristina Háfoss segði hinvegin, at Jørgen Niclasen hevði fingið sær sum hobby at leggjast eftir Landsbankanum.
Aðrir tingmenn luttóku eisini í orðaskiftinum.
Mest lisið í farnu viku
Samband
Heygsvegur 8
490 Strendur