Hanna Jensen, landsstýriskvinna við undirvísingar- og granskingarmálum, hevur góðkent virksemið hjá Háskúlanum í Sandoynni sum eina royndarskipan í 2019.

Háskúlin í Sandoynni kann tí fara undir at skipa háskúlaskeið, sum hava eina samanrenning ímillum evnini matlist, tilfeingi, náttúru og náttúrunýtslu.

Í umsóknini til Mentamálaráðið vísti stýrið fyri Háskúlan á Sandi á, at háskúlaformurin, sum er tann frælsasti skúlaformurin, er serliga vælegnaður til hesa samanrenningina millum matlist, handverk og lívfrøði. Harumframt seta tey sær fyri, at Háskúlin í Sandoynni frá byrjan vera nýhugsandi og hava høgt støði og taka hinar norðurlendsku mentaninar uppí sítt virki.  

Fara møguliga at víðka útbúgvingina

Stýrið fyri háskúlan á Sandi sær eisini fyri sær, at tað seinni skal kunna bera til at stovnseta hægri útbúgvingar í Føroyum innan hetta økið. Eisini verður hugsað um samstarv við Føroya Fólkaháskúla og Ítróttarháskúlan í Suðuroy, so allir tríggir háskúlarnir kunnu bjóða sínum næmingum umbýtisskipanir og vitjanir.

“Vit hava sett 1 millión av til virksemið í 2019, soleiðis, at háskúlin í Sandoynni fær møguleika at gera nakrar royndir í ár. Hesar kunnu so verða grundarlag undir at skipa ein fastan landbúnaðarháskúla í Sandoynni, sum kann virka alt árið og hava høvuðsdent á matvørutilfeingi, dyrking, framleiðslu og gróður í føroysku náttúruni. Vit hava hartil lagt dent á, at skúlin eisini eigur at leggja áherðslu á sjálvbjargni við atliti at rávørum og tilgerð, matsiðir, matlist og matgóðsku,” sigur Hanna Jensen, landsstýriskvinna.

Umframt landbúnaðin verður eisini í undirvísingini lagdur dentur á føroyskt mál, siðmenning og føroyska mentan.