Ókeypis fyrilestur um skíggjanýtslu og skíggjavanar
Komandi týskvøld kl. 20 verða fyrilestrar á skránni í Klingruni hjá Føroya Tele í Hoyvík.
Á skrá eru fyrilestrar við Prof. Dr. Manfred Spitzer og Gitte Klein um ávikavist skíggjanýtslu og skíggjavanar, og aftaná verður pallborðskjak við teimum báðum umframt Magna Mohr, Honnu Jensen, Súsonnu Olafadóttir Skaale og Ólavi Ellefsen.
Hvørji árin og hjáárin eru av skíggjanýtslu, og hvussu ávirkar skíggjanýtsla heilsu, útbúgving og samfelag?Henda spurningin fer Prof. Dr. Manfred Spitzer at svara upp á í sínum fyrilestri, ið leggur dent á, hvussu skíggjanýtsla hevur ávirkað heilsu, útbúgving og samfelag gjøgnum tíðirnar, og hvussu vit kunnu skipa okkum, soleiðis at vit kunnu liva lið um lið við tøknini og fáa sum mest burturúr henni, samstundis sum vit kunnu verja okkum móti óhepnum avleiðingum.
Gitte Klein er bachelor í sálarfrøði og kandidatlesandi og stovnari av fyritøkuni Grit. Á tiltakinum fer hon at leggja úrslitið fram av hennara kanning um skíggjavanar hjá føroyskum foreldrum. Í kanningini hevur fokus verið á skíggjanýtslu hjá foreldrum at børnum undir skúlaaldur, og hvussu henda skíggjanýtsla hevur ávirkað tilknýtið millum foreldur og barn, sum er grundleggjandi fyri kensluligu, sosialu og kognitivu menningina hjá barninum.
124 foreldur hava luttikið í kanningini, umframt at skipað varð fyri einum fokusbólki, sum umrøddi avbjóðingarnar hjá foreldrum í mun til skíggjar.
Heini í Skorini verður orðstýrari, og pallborðskjakið verður á enskum. Høvi verður at kjakast og seta spurningar um evnið, skriva fyrireikararnir í innbjóðing á facebook.
Mest lisið í farnu viku
Samband
Heygsvegur 8
490 Strendur