"Hóast børn og ung kunnu læra umvegis ein teldil, so er veruleikin tann, at mesta av tíðini fer við at hyggja eftir filmun á YouTube, Netflix og øðrum online sjónvarpi. Tey gerast dølsk av tí". Tað sigur neurobiologurin og rithøvindurin Michel Desmurget.

Hann hevur skrivað bókina, sum hevur selt mest í Frankaríki seinastu vikurnar. Bókin eitur La fabrique du crétin digital – les dangers des écrans pour nos enfants (á donskum: Den digitale idiotfabrik – skærmene udgør en fare for vore børn). 

Desmurget tvíheldur um, at vit mugu tosa um hvat teldur og teldlar koma í staðin fyri:

"Barnaheilin hevur brúk fyri fysiska nærveru, at tosa við vaksin, at tosa og verða hoyrt. Uttan fylgitónleik. Uttanfyri tveydimensjonella universi á skýggjanum," sigur Desmurget í samrøðu við Weekendavisen.dk. 

Desmurget sigur, at afturvendandi PISA-kanningarnar, vísa at í Svøríki og Finnlandi, har tey hava gjørt nógv burturúr at digitalisera frálæruna seinastu árini, eru næmingar farnir aftur í førleika innan bæði lesing og rokning.

Sambært Desmurget brúka børn í 1. flokki í miðal 1000 tímar á skýggja um árið og tímatalið økjist við aldrinum. Studentaskúlanæmingar brúka í miðal 2400 tímar um árið. 

"Samfelagið eru broytt nógv seinastu øldirnar, men heilin hjá menniskjanum er ikki broyttur. Heilin hevur trupult við passivt at handfara hesa bumbing av kunning og ávirkan, sum byrjar í heilt ungum aldri," sigur Desmurget.

Desmurget mælir foreldur til at børn slettis ikki brúka skerm fyrstu seks árini. Og, eftir tað, ikki meir enn 1 tíma dagliga. Tað fara børnini at takka foreldrini fyri tá tey gerast vaksin, sigur rithøvindurin og neurobiologurin við Weekendavisen. 

Les meira av samrøðuni við Michel Desmurget í leinkjuni her.