SEV: Ætlanir um tvey sveimandi elorkuverk í Vestmannasundi
SEV ætlar at seta tvey orkuverk niður í Vestmannasundi á 55-60 metra dýpi. Orkuverkini minna um luftdrekar, sum ferðast í eini áttatalsbreyt í rákinum í Vestmannasundi. Drekarnir ella sjódrekarnir kunnu ferðast við 6-10 metur um sekundið. Talan er um eina royndarverkætlan, skrivar Umhvørvisstovan á heimsíðu síni.
Tá sjódrekarnir framleiða ravmagn, sveima teir áhaldandi millum 20 og 40 metra dýpi. Breiddin á áttatalsbreytini er umleið 35 metur og samlaða longdin umleið 60 metur. Á kyrrindum hanga sjódrekarnir minst 8 metur undir vatnskorpuni.
Sjódrekarnir hava ein framleiðslumátt á 100 kW hvør. Fyribils metingar vísa, at teir kunnu fara at framleiða umleið 300-400 MWh um árið hvør, svarandi til elnýtsluna hjá eini 120 til 160 sethúsum, skrivar Umhvørvisstovan.
SEV hevur fingið gjørt metingar um, hvørji árin hesir sjódrekar kunnu hava á sjófugl, fisk og havsúgdjór í Vestmannasundi, og mett er eisini um árin á fiskiskap. SEV metir ikki, at drekarnir fara at hava stórvegis ávirkan á fisk og sjófugl, men at havsúgdjór helst er tann mest viðbrekni bólkurin. Umhvørvisárinsmetingin er almenn og kann lesast her.
Hoyringsfreistin at koma við viðmerkingum til umhvørvisárinsmetingina er 22. februar. Viðmerkingar skulu sendast til us@us.fo ella Umhvørvisstovuna, Traðagøta 38, FO-160 Argir.
Mest lisið í farnu viku
Samband
Heygsvegur 8
490 Strendur